વડોદરા- ઇદના જૂલુસ દરમિયાન ફતેપુરા વિસ્તારમાંથી પસાર થતા એક જૂલુસમાં વાંધાજનક અને ઉશ્કેરણીજનક નારા લગાવવામાં આવતા સિટિ  પોલીસે જૂલુસના આયોજક, ડી.જે.ઓપરેટર સહિત ત્રણ આરોપીઓ સામે ગુનો દાખલ કર્યો છે. ફતેપુરા ભાંડવાડા  ભોઈ કબ્રસ્તાન પાસે રહેતા હૈદરખાન મુફતિયારખાન પઠાણ દ્વારા ઇદ નિમિત્તે એક જૂલુસ મંજૂરી લઈને કાઢવામાં આવ્યું હતું. જે જૂલુસ મુસ્લિમ ભોઈ કબ્રસ્તાનથી નીકળી ભાડવાડા, મંગલેશ્વર ઝાંપા, ફતેપુરા ચાર રસ્તા, અલિફ નગર, ભૂંતડીઝાંપા, કારેલીબાગ પોલીસ સ્ટેશન,  નાગરવાડા, સૈયદવાડા, એમ.એ.એસ.સ્કૂલ ચાર રસ્તા, નવાબવાડાની અંદર થઇ રાવપુરા મેન રોડ, મચ્છીપીઠની અંદર થઇ એમ.ઇ.એસ.સ્કૂલ પાસે આવી પૂર્ણ થવાનું હતું.

આ જૂલુસમાં ડી.જે.વગાડવાની મંજૂરી વારસિયા પોલીસ સ્ટેશનમાંથી લેવામાં આવી હતી.જૂલુસ અલીફ નગર ત્રણ રસ્તા થી ભાંડવાડા તરફ જતું હતું. તે સમયે ડીજે ઓપરેટર દ્વારા સરફરાજ ઉર્ફે છોટુ કાલીયાની સૂચનાથી વાંધાજનક અને ઉશ્કેરણીજનક ગીતો અને નારા વગાડવામાં આવ્યા હતા. ડીસીપી પન્ના મોમાયા દ્વારા આ અંગે તપાસ કરવાની સૂચના આપી હતી. સિટિ પોલીસે તપાસ કરતા ગીતો અને નારા ઉશ્કેરણીજનક હતા.  જે અંગે પોલીસે ગુનો દાખલ કર્યો હતો. પોલીસે (૧) જૂલુસના  આયોજક હૈદરખાન પઠાણ (૨)  ઉશ્કેરણીજનક નારા વગાડવાનું કહેનાર સરફરાજ ઉર્ફે કાલીયા (રહે. ભાંડવાડા, ફતેપુરા)  તથા ડીજે ઓપરેટર રાહુલ રાધેશ્યામભાઇ ધોબી( રહે. રાજીવ નગર, ન્યૂ વી.આઇ.પી.રોડ) ની સામે ગુનો દાખલ કરી ધરપકડ કરી છે. વીડિયો  સોશિયલ મીડિયા પર વાયરલ પણ થયો હતો. પોલીસે જણાવ્યું હતું કે, આરોપીઓનો કોઇ ગુનાઇત ભૂતકાળ નથી. જૂલુસના આયોજક  હૈદરખાન છૂટક ધંધો કરે છે. જ્યારે સરફરાજ એ.સી.રિપેરીંગનું કામ કરે છે.

વડોદરા,આરોપી દ્વારા આ પેન ડ્રાઇવ ક્યાં તૈયાર કરવામાં આવ્યું ? આ પૂર્વયોજીત કાવતરું હતું કે કેમ ? અન્ય કોણ સામેલ છે ? તે અંગે સિટિ પોલીસે આરોપીના રિમાન્ડ મેળવવાની તજવીજ હાથ ધરી છે. ઉલ્લેખનીય છે કે, આ ગીતો ઉર્દૂ અને હિન્દી ભાષામાં મિક્સ હતા. જેથી, તે ગીતના અમુક શબ્દો જ સમજમાં આવી શકે તેમ હતા. આખા ગીતનો અર્થ શું થાય છે ? તે અંગે પોલીસે ઉર્દૂ ભાષાના જાણકારની મદદ લીધી છે.