સોના અને ચાંદીના રોકાણકારો માટે આજે સવારના સમયે બજારમાંથી માઠા સમાચાર સામે આવ્યા છે. આજે બજાર ખુલતાની સાથે જ બંને કિંમતી ધાતુઓના ભાવમાં મોટો કડાકો જોવા મળ્યો છે. ખાસ કરીને ચાંદીમાં જોરદાર વેચવાલીને કારણે ભાવમાં મોટું ગાબડું પડ્યું છે.

આજે બજાર ખુલતાની સાથે જ ચાંદીના ભાવમાં તીવ્ર ઘટાડો નોંધાયો છે. ચાંદીનો અગાઉનો બંધ ભાવ (Prev. Close) ₹2,44,360.00 હતો, જેની સામે આજે બજાર ₹2,38,489.00 પર ખૂલ્યું હતું. આમ, બજાર ખુલતાની સાથે જ ચાંદીમાં પ્રતિ કિલો ₹5,871નો સીધો ઘટાડો જોવા મળ્યો હતો. જોકે, ટ્રેડિંગ દરમિયાન ઘટાડો વધુ ઘેરો બન્યો હતો અને ચાંદી વધુ ગબડીને 235789ના સ્તરને સ્પર્શી ગઈ હતી. આ સાથે આજે ચાંદીના ભાવમાં તેના ઉચ્ચ સ્તરથી અત્યાર સુધીમાં ₹8,571થી વધુનો કડાકો બોલાઈ ચૂક્યો છે, જે રોકાણકારો માટે ચિંતાનો વિષય બન્યો છે. હાલમાં ચાંદી તેના પાછલા બંધ ભાવથી આશરે 3.04% એટલે કે ₹7,418.00 રૂપિયાના ઘટાડા સાથે ₹2,36,942 પર ટ્રેડ કરી રહી છે.

ચાંદીની પાછળ સોનાના ભાવમાં પણ નોંધપાત્ર ઘટાડો જોવા મળ્યો છે. સોનાનો અગાઉનો બંધ ભાવ ₹1,55,895.00 પ્રતિ 10 ગ્રામ હતો. આજે સોનું ₹1,54,999.00 ના ભાવે ખૂલ્યું હતું. બજાર ખુલતાની સાથે જ સોનામાં અગાઉના બંધ ભાવની સરખામણીએ ₹896નો ઘટાડો જોવા મળ્યો હતો. ત્યારબાદ સોનું વધુ ગગડીને ₹1,54,386.00 ના લઘુત્તમ સ્તર સુધી પહોંચી ગયું હતું. આમ, સોનામાં પણ તેના પાછલા બંધ ભાવથી ₹1,500થી વધુનો કડાકો જોવા મળ્યો છે. જોકે સમાચાર લખવા સુધીમાં સોનામાં થોડીક રિકવરી દેખાઈ હતી અને તેની કિંમત ₹1,54,687 રૂપિયા પર ટ્રેડ થવા લાગી હતી.