તેહરાન : ઈઝરાયલ-ઈરાન બંને એકબીજા પર મિસાઈલો અને ડ્રોનથી સતત હુમલાઓ કરી રહ્યા છે. બંને દેશોના યુદ્ધને આજે આઠમો દિવસ છે, ત્યારે ઈરાનના સુપ્રીમ લીડર અયતુલ્લા અલી ખામેનેઈ (Iran Supreme Leader Ali Khamenei) યુદ્ધના માહોલમાં કોઈપણ રીતે નમતું જોખવા નથી અને તેમણે ફરી ઈઝરાયલને ધમકી આપી છે. તેમણે કહ્યું કે, ‘ઈઝરાયલ પોતાના કર્મોની સજા ભોગવી રહ્યું છે. જો હુમલાઓ ચાલુ રાખશે તો અમે પણ જડબાતોડ જવાબ આપીશું.’
બીજીતરફ ઈરાનના રાષ્ટ્રપ્રમુખ મસૂદ પેજેશ્કિયને પણ ઈઝરાયલી હુમલાને લઈ કડક ચેતવણી આપી છે. તેમણે કહ્યું કે, ‘ઈઝરાયલ કોઈપણ શરત વગર તાત્કાલીક હુમલો રોકે, તે જ શાંતિનો રસ્તો છે. જો ઈઝરાયલ હુમલા ચાલુ રાખશે તો અમે મજબૂરીથી જડબાતોડ જવાબ આપીશું.’ ઈરાનના વિદેશ મંત્રી અબ્બાસ અરાઘચીએ સ્પષ્ટ શબ્દોમાં કહ્યું કે, ‘જ્યાં સુધી ઈઝરાયલ હુમલા કરતું રહેશે, ત્યાં સુધી અમે અમેરિકા કે અન્ય કોઈ દેશ સાથે આ મુદ્દે કોઈ વાતચીત નહીં કરીએ. ઈરાને કહ્યું છે કે, આવી સ્થિતિમાં યુદ્ધ અટકાવવાની વાતચીત કરવી અસંભવ છે.

ગુરુવારે (12મી જૂન) રાત્રે ઈઝરાયલે ઈરાનના પરમાણુ ઠેકાણાઓ પર બોમ્બમારો કર્યો હતો જેના બાદ  ઇરાને પણ બદલો લીધો. ઈઝરાયલી સેનાએ ગુરુવારે (19મી જૂન) જણાવ્યું હતું કે, ઈરાને નાગરિકોને ભારે જાનહાનિ પહોંચાડવાના હેતુથી ક્લસ્ટર બોમ્બ લઈ જતી મિસાઇલ છોડી હતી. આ યુદ્ધમાં ક્લસ્ટર મિસાઇલોનો ઈરાન દ્વારા પહેલીવાર પ્રયોગ કરાયો હતો. ઈરાન દ્વારા ઝીંકાયેલી મિસાઇલમાં ઈઝરાયલના મધ્યમાં લગભગ 4 માઇલ (7 કિલોમીટર)ની ઊંચાઈએ વિસ્ફોટ થયો હતો, જેના કારણે તેની અંદર રહેલા લગભગ 20 ક્લસ્ટર બોમ્બ 5 માઇલ (8 કિલોમીટર)ની ત્રિજ્યામાં વિખેરાઈ ગયા હતા અને તબાહી મચાવી હતી.