રાધનપુરમાં મશાલી રોડ પર ખુલ્લેઆમ દારુનું વેચાણ થતું હોવાનું એક વાયરલ વીડિયોએ પોલ ખોલી. આ વીડિયોમાં દેખાય છે કે બરફ લઈ જવાના આઈસ બેગમાં 25 કે તેથી વધુ ટીન મૂકયા છે. આ ટીનમાં કોઈ કોલ્ડ ડ્રીંક નહીં પરંતુ પ્રતિબંધિત દારુ-બિયર જેવા આલ્કોલની સામગ્રી ભરેલી છે. તેની પાસે બેસેલ શખ્સ ખુલ્લેઆમ દારુ-બિયરનું વેચાણ કરે છે અને વધુ આશ્ચર્યની વાત છે કે વેચાણ કરતા સ્થળ પર ઓનલાઈન પેમેન્ટની પણ સુવિધા છે. 

બુટલેગરે દારુ-બિયરના વેચાણની કિમંત લેવા સ્થળ પર સ્કેનર લટકાવ્યું છે. રાધનપુરમાં ખુલ્લેઆમ બિયરના વેચાણને લઈને સ્થાનિક પોલીસની કામગીરી પર સવાલ ઉઠ્યા છે. એવું લાગે છે કે પોલીસની રહેમ નજર હેઠળ આ કારોબાર થઈ રહ્યો છે. છેલ્લા કેટલાક સમયમાં પાટણમાં દારુના વેચાણમાં વધારો થયો છે. 

અગાઉ પાટણ પોલીસે પદમનાથ ચાર રસ્તા પાસેથી₹4.30 લાખની કિંમતનો દારૂનો જથ્થો જપ્ત કર્યો હતો. ગુજરાતમાં વર્ષ 1960 થી દારૂબંધી લાગુ થઈ હોવા છતાં આજે પણ રાજ્યમાં પ્રતિબંધિત દારુનું વેચાણ થઈ રહ્યું છે. વર્ષ 2024માં ગુજરાતમાં 22 કરોડથી વધુ કિંમતનો દારૂ ઝડપાયો. આ આંકડા રાજ્યમાં દારૂબંધીના કાયદાની અમલવારી પર સવાલો ઉભા કરે છે.