મહારાષ્ટ્રના રાજકારણમાં અજિત પવારના અચાનક અવસાનથી સર્જાયેલી શૂન્યાવકાશ વચ્ચે અનેક અટકળો વહેતી થઈ છે. આ ગંભીર પરિસ્થિતિ પર વાત કરતા NCPના વરિષ્ઠ નેતા શરદ પવારે સ્પષ્ટ કર્યું છે કે અજિત પવારની જવાબદારીઓ સંભાળવા માટે હવે કોઈએ મક્કમતાથી આગળ આવવું પડશે.

રાજકીય વર્તુળોમાં ચર્ચા છે કે અજિત પવારના પત્ની સુનેત્રા પવારને નાયબ મુખ્યમંત્રી પદ સોંપવામાં આવી શકે છે. જોકે, આ અંગે શરદ પવારે જણાવ્યું હતું કે, "સુનેત્રા પવારના શપથ ગ્રહણ અંગે મારી પાસે કોઈ સત્તાવાર જાણકારી નથી. આ પ્રકારના મોટા નિર્ણયો પક્ષ સ્તરે લેવાતા હોય છે અને અંતિમ નિર્ણય પક્ષની લોકશાહી પ્રક્રિયા દ્વારા જ લેવામાં આવશે."

શરદ પવારે એક મહત્વનો ખુલાસો કરતા જણાવ્યું કે જયંત પાટિલ અને અજિત પવાર વચ્ચે છેલ્લા ચાર મહિનાથી બે રાષ્ટ્રવાદી કોંગ્રેસ પાર્ટીઓના વિલીનીકરણ અંગે ચર્ચા ચાલી રહી હતી. આ ચર્ચાઓ સકારાત્મક રીતે આગળ વધી રહી હતી, અને 12મી તારીખે જાહેર જાહેરાત થવાની હતી. તેમના મતે, અજિત પવાર આ પ્રક્રિયા પ્રત્યે ખૂબ જ ગંભીર હતા અને સંગઠનને એક કરવા માંગતા હતા.

અજિત પવારને યાદ કરીને, શરદ પવાર ભાવુક થઈ ગયા. તેમણે કહ્યું કે અજિત પવાર એક સક્ષમ, મહેનતુ અને પ્રતિબદ્ધ નેતા હતા જેમણે હંમેશા સામાન્ય લોકો માટે કામ કર્યું. તેઓ લોકોની સમસ્યાઓને ઊંડાણપૂર્વક સમજતા હતા અને ન્યાય માટે સતત પ્રયત્નશીલ રહેતા હતા. બારામતીના લોકો હંમેશા તેમની પડખે ઉભા રહ્યા, અને તેમણે પણ તેમની ફરજો નિભાવવામાં ક્યારેય કોઈ કસર છોડી ન હતી.