અમેરિકાએ પણ હવે ઈઝરાયલ અને ઈરાન વચ્ચેના યુદ્ધમાં ઝંપલાવ્યું છે. રવિવારે (22મી જૂન) સવારે ભારતીય સમય મુજબ અમેરિકાએ હવાઈ હુમલામાં ઈરાનના ત્રણ પરમાણુ ઠેકાણા ફોર્ડો, નતાન્ઝ અને ઇસ્ફહાનને નિશાન બનાવ્યા. ઈઝરાયલે આ હુમલાઓ બદલ અમેરિકાની પ્રશંસા કરી હતી. આ દરમિયાન સંયુક્ત રાષ્ટ્ર (UN)એ અમેરિકાની આ કાર્યવાહી પર ચિંતા વ્યક્ત કરી અને કહ્યું કે 'આ યુદ્ધ હવે બેકાબૂ થવાનો ભય ઊભો થયો છે, પરિસ્થિતિ હવે કાબૂમાં નથી રહી.'

સંયુક્ત રાષ્ટ્રના મહાસચિવ એન્ટોનિયો ગ્યુટરેસે કહ્યું કે, 'અમેરિકા દ્વારા ઈરાન વિરુદ્ધ કરવામાં આવેલી સૈન્ય કાર્યવાહી વિશે સાંભળીને મને ખૂબ જ ચિંતા થઈ છે. આ એક ખતરનાક ઉશ્કેરણીજનક કાર્યવાહી છે જે પહેલાથી જ તણાવની આરે છે અને તે આંતરરાષ્ટ્રીય શાંતિ અને સુરક્ષા માટે સીધો ખતરો છે.'