શેરબજારમાં એફઆઈઆઈની વેચવાલી અને વૈશ્વિક પડકારો વચ્ચે મંદીનું જોર યથાવત છે. આજે સપ્તાહની શરૂઆતમાં સેન્સેક્સ અને નિફ્ટી પોઝિટિવ ખૂલ્યા બાદ સતત તૂટ્યા છે. આઈટી શેર્સમાં પણ મોટાપાયે પ્રોફિટ બુકિંગ જોવા મળ્યું છે.

નબળા ત્રિમાસિક પરિણામો અને વિદેશી રોકાણકારોની વેચવાલીના પગલે આજે સેન્સેક્સ 300 પોઈન્ટ ઉછાળે ખૂલ્યા બાદ 600થી વધુ પોઈન્ટ તૂટી 77000નું લેવલ પણ ગુમાવ્યું હતું. બાદમાં 11.00 વાગ્યે 442.21 પોઈન્ટના કડાકે 77138.10 પર ટ્રેડ થઈ રહ્યો હતો. નિફ્ટી પણ 23400ની સાયકોલોજિકલ સપાટી ગુમાવી 181.70 પોઈન્ટના કડાકે 23351.00 પર ટ્રેડ થઈ રહ્યો હતો.

અમેરિકામાં ટ્રમ્પને બહુમતી મળવાની સાથે ડોલર ઈન્ડેક્સમાં આવેલી તેજીના પગલે આઈટી અને ટેક્નોલોજી શેર્સમાં આકર્ષક ઉછાળો જોવા મળ્યો હતો. જો કે, ફેડ રિઝર્વ જેરોમ પોવેલે વ્યાજના દરોમાં ઘટાડાની શક્યતાઓ નકારતાં આઈટી અને ટેક્નોલોજી શેર્સમાં રોકાણકારો પ્રોફિટ બુક કરી રહ્યા છે. આજે બીએસઈ ઈન્ફોર્મેશન ટેક્નોલોજી ઈન્ડેક્સ 3 ટકા તૂટી 40861.16ની બોટમે પહોંચ્યો હતો. 11 વાગ્યા સુધીમાં જ તેમાં 1337 પોઈન્ટની વોલેટિલિટી જોવા મળી હતી. ટેક્નોલોજી ઈન્ડેક્સ પણ 2.50 ટકાના ઘટાડે ટ્રેડ થઈ રહ્યો હતો. ટીસીએસ 3.64 ટકા, વિપ્રો 3.52 ટકા, માઈન્ડ ટ્રી 3.54 ટકા, ઈન્ફોસિસ 3.12 ટકાના ઘટાડે ટ્રેડ થઈ રહ્યા હતા.