અમેરિકાના રાષ્ટ્રપ્રમુખ ડોનાલ્ડ ટ્રમ્પે ઈઝરાયલ-ઈરાન વચ્ચે યુદ્ધવિરામ કરાવ્યું હોવાનો દાવો કર્યા બાદ હવે તેમણે ગાઝામાં યુદ્ધવિરામના પ્રયાસો શરૂ કરી દીધા છે. ટ્રમ્પે આજે (29) ગાઝામાં સંઘર્ષ વિરામ પર ચર્ચા-વિચારણા ફરી શરૂ કરવા અપીલ કરી છે અને એક સમજૂતીનું આહવાહન કર્યું છે. ઈઝરાયલ અને હમાસ વચ્ચે છેલ્લા 20 મહિનાથી યુદ્ધ ચાલી રહ્યું છે, ત્યારે રિપોર્ટમાં સંકેત મળ્યા છે કે, ઈઝરાય-હમાસ યુદ્ધ બંધ કરવાની સમજૂતી નજીક પહોંચી ગયા છે.

મીડિયા રિપોર્ટ મુજબ એક ઈઝરાયલી અધિકારીના દાવા મુજબ વડાપ્રધાન બેન્જામિન નેતન્યાહૂ આગામી સપ્તાહમાં વોશિંગ્ટન જઈ શકે છે, જે નવી સમજૂતી પર કામ થઈ રહ્યું હોવાના સંકેત છે. આ મામલે અધિકારીએ વધુ માહિતી આપી નથી, પરંતુ નેતન્યાહૂ ગાઝા યુદ્ધ મામલે વોશિંગ્ટન જઈ રહ્યા હોવાની અટકળો શરૂ થઈ ગઈ છે. ટ્રમ્પે રવિવારે એક પોસ્ટમાં લખ્યું છે કે, MAKE THE DEAL IN GAZA. GET THE HOSTAGES BACK (ગાઝામાં સમજૂતી કરો, બંધકોને પરત લાવો’. અગાઉ ટ્રમ્પે યુદ્ધવિરામની આશા વ્યક્ત કરી કહ્યું હતું કે, આગામી અઠવાડિયાની અંદર સંઘર્ષ વિરામ સમજૂતી થઈ શકે છે. અમે ગાઝા યુદ્ધવિરામ માટે કામ કરી રહ્યા છીએ અને તેને ઠીક કરવાનો પ્રયાસ કરી રહ્યા છે.