સાયબર ક્રાઈમના અવનવા કિસ્સાઓ દરરોજ સામે આવી રહ્યા છે. ક્યારેક લોકોને પૈસાની લાલચ આપીને તો ક્યારેક નોકરીના ખોટા વચનો આપીને તેમને ભોગ બનાવવામાં આવે છે. આવા જ એક કિસ્સામાં ભારત સરકારે લાઓસમાંથી 67 પીડિતોને રેસ્ક્યુ કર્યા છે. આ યુવાનોને લાઓ પીડીઆરના ગોલ્ડન ટ્રાયેંગલ સ્પેશિયલ ઈકોનોમિક ઝોન (GTSEZ)માં સાયબર-સ્કેમ સેન્ટરોમાંથી બચાવી લેવામાં આવ્યા છે.

આ યુવાનોને સારા પગારવાળી નોકરીના બહાને લાઓસ લઈ જવામાં આવ્યા હતા. ત્યાં તેમને સાયબર છેતરપિંડી કરવા માટે મજબૂર કરવામાં આવ્યા. GTSEZમાં ગુનાહિત સિન્ડિકેટ દ્વારા યુવાનોને ધમકી આપવામાં આવી હતી. જ્યારે આ યુવાનોએ મદદ માટે અપીલ કરી, ત્યારે ભારતીય દૂતાવાસ હરકતમાં આવ્યું અને અધિકારીઓએ યુવાનોનો સંપર્ક કર્યો હતો.