આસામની રાજધાની ગુવાહાટીના જી.એસ. રોડ પર આવેલા લચિત નગરના વ્યસ્ત વ્યાપારી વિસ્તારમાં સોમવારે રાત્રે લગભગ 10:00 વાગ્યે 'હોટેલ બિલાસ ઇન' ખાતે અજાણ્યા હુમલાખોરોએ અંધાધૂંધ ગોળીબાર કર્યો હતો. આ હુમલામાં એક જ પરિવારના 4 સભ્યો સહિત કુલ 5 લોકોના મોત નીપજ્યા હતા, જ્યારે ગોળીબારની ઝપટે ચડી ગયેલા હોટેલના કર્મચારીઓ સહિત અન્ય કેટલાક લોકો ગંભીર રીતે ઘાયલ થયા હતા. વાહનો અને લોકોની અવરજવર વચ્ચે થયેલા ગોળીબારથી સમગ્ર વિસ્તારમાં અફરાતફરી અને ભાગદોડ મચી ગઈ હતી.

ઘટનાની જાણ થતાં જ ગુવાહાટી પોલીસની વરિષ્ઠ ટીમો અને એમ્બ્યુલન્સનો કાફલો તાત્કાલિક સ્થળ પર પહોંચી ગયો હતો. પોલીસે બચાવ કામગીરી હાથ ધરીને ઇજાગ્રસ્તોને સારવાર માટે નજીકની સરકારી અને ખાનગી હોસ્પિટલોમાં દાખલ કર્યા છે. ગુવાહાટીના પોલીસ કમિશનર પાર્થ સારથી મહંતાએ પુષ્ટિ કરતાં જણાવ્યું હતું કે ઘટનાસ્થળેથી મળેલા 4 મૃતદેહોને પોસ્ટમોર્ટમ માટે ખસેડાયા હતા, જ્યારે એક ગંભીર ઘાયલનું સારવાર દરમિયાન મોત નીપજ્યું હતું.

વધુમાં, કેટલાક ઇજાગ્રસ્તોની હાલત અત્યંત નાજુક હોવાથી મૃત્યુઆંક વધવાની આશંકા વ્યક્ત કરવામાં આવી હતી. બીજી તરફ, પોલીસે તાત્કાલિક નાકાબંધી કરીને હુમલાના 1 કલાકની અંદર જ દરોડો પાડી એક શંકાસ્પદ શખ્સની ધરપકડ કરી લીધી હતી તેમજ તેની પાસેથી .30-બોરની પિસ્તોલ જપ્ત કરી હતી.

હાલમાં પોલીસે સમગ્ર લચિત નગર વિસ્તારને ઘેરી લીધો છે અને મૃતકોની વિધિવત ઓળખ કરવાની પ્રક્રિયા ચાલી રહી છે. આ હુમલામાં અન્ય કેટલા લોકો સામેલ હતા અને તેમનો મુખ્ય હેતુ શું હતો તે જાણવા પકડાયેલા શખ્સની કડક પૂછપરછ ચાલુ છે, જ્યારે વરિષ્ઠ પોલીસ અધિકારીઓ ગુનાહિત કાવતરું કે જૂની અદાવતના પાસાઓથી તપાસ ચલાવી રહ્યા છે.