દ્વારકામાં આસો સુદ પૂર્ણિમાએ ભક્તોનું ઘોડાપૂર ઉમટ્યું, પોલીસના ચુસ્ત બંદોબસ્ત વચ્ચે શ્રદ્ધાળુઓએ દર્શન કર્યા

October 27, 2026

સુપ્રસિદ્ધ યાત્રાધામ દેવભૂમિ દ્વારકામાં આસો સુદ પૂર્ણિમાના પાવન પર્વે ભક્તિ અને શ્રદ્ધાનો અદ્ભુત સંગમ જોવા મળ્યો હતો. વિક્રમ સંવત 2082ની અંતિમ પૂનમનું વિશેષ ધાર્મિક મહત્વ હોવાથી ગુજરાતના ખૂણે ખૂણેથી હજારો ભાવિકોનું ઘોડાપૂર દ્વારકાધીશના દર્શન માટે ઉમટી પડ્યું હતું.

પવિત્ર દિવસે ગોમતી નદીમાં સ્નાન કર્યા બાદ ભક્તો જગતમંદિરમાં ભગવાન કાળિયા ઠાકરના દિવ્ય દર્શન કરવા પહોંચી ગયા હતા. ચાર ધામોમાં વિશિષ્ટ સ્થાન ધરાવતા દ્વારકા ખાતે વહેલી સવારે 6 વાગ્યાથી જ દર્શનાર્થીઓની ભારે ભીડ જામી હતી. શ્રદ્ધાળુઓએ મંદિરની 56 સીડીઓ ચડીને સ્વર્ગ દ્વાર મારફતે જગતમંદિરમાં પ્રવેશ કર્યો હતો.

વધુમાં, આસો પૂનમના અવસરે ભાવિકોએ ભગવાન શ્રીકૃષ્ણના દિવ્ય અને અલૌકિક દર્શન કરીને ધન્યતા અનુભવી હતી. આ દરમિયાન ભક્તોએ પોતાના પરિવારમાં સુખ અને શાંતિ જળવાઈ રહે તે માટે પ્રાર્થના કરી હતી. બીજી તરફ, યાત્રાધામમાં કાયદો અને વ્યવસ્થા જળવાઈ રહે તેમજ ભક્તો શાંતિપૂર્વક ભગવાન દ્વારકાધીશના દર્શન કરી શકે તે માટે પોલીસ તંત્ર દ્વારા ચુસ્ત બંદોબસ્ત ગોઠવવામાં આવ્યો હતો.