મસ્કતમાં અમેરિકા-ઈરાનના અધિકારીઓ વચ્ચે બેઠક
અમેરિકા અને ઈરાન વચ્ચે યુદ્ધના ભણકારા વાગી રહ્યા છે. બંને દેશો વચ્ચે ગમે ત્યારે યુદ્ધ શરૂ થવાની આશંકાના કારણે મિડલ ઈસ્ટના દેશો ચિંતામાં મુકાઈ ગયા છે. બંને દેશો શાંત પડે અને યુદ્ધ જેવી સ્થિતિ ઉભી ન કરે તે માટે હવે ઓમાને મહત્ત્વની પહેલ શરૂ કરી દીધી છે. આ માટે ઓમાને મધ્યસ્થતા કરી રાજધાની મસ્કતમાં અમેરિકા-ઈરાન વચ્ચે બેઠક યોજી છે.
મીડિયા રિપોર્ટ મુજબ, અમેરિકા અને ઈરાન વચ્ચે મસ્કતના આંતરરાષ્ટ્રીય એરપોર્ટ પાસેના પેલેસમાં આજે (6 ફેબ્રુઆરી) બેઠક યોજાઈ હતી. બેઠકમાં અમેરિકન અધિકારીઓ અને ઈરાનના વિદેશ મંત્રી અબ્બાસ અરાઘચી (Abbas Araghchi)નું પ્રતિનિધિમંડળ આવ્યું હતું. ઈરાનની સરકારી ટેલિવિઝન ચેનલે કહ્યું કે, અરાઘચી ઓમાનના વિદેશમંત્રી બદ્ર અલ-બુસૈદી સાથે મુલાકાત કરવા માટે મસ્કત આવ્યા છે.
ઓમાને કહ્યું છે કે, તહેરાનમાં ચાલી રહેલા પરમાણુ કાર્યક્રમના કારણે ઈરાન સાથે અમેરિકાનો વિવાદ ચાલી રહ્યો છે. આ વિવાદને શાંત પાડવા માટે ઓમાને મધ્યસ્થતા કરી છે. ઓમાનના વિદેશ મંત્રાલયે એક્સ પર પોસ્ટ કરીને લખ્યું છે કે, ‘વિદેશ મંત્રી બદ્ર અલ-બુસૈદી (Sayyid Badr Al-Busaidi)એ ઈરાનના વિદેશ મંત્રી, પશ્ચિમ એશિયામાં અમેરિકન રાજદૂત સ્ટીવ વિટકૉફ (Steve Witkoff), રાષ્ટ્રપ્રમુખ ડોનાલ્ડ ટ્રમ્પ (US President Donald Trump)ના જમાઈ જેરેડ કુશનર (Jared Kushner) સાથે અલગ-અલગ મુલાકાત કરી છે. આ બેઠકનો હેતુ રાજદ્વારી સંબંધો સુધારવા, વિવાદનો નિવેડો લાવવા માટેનો છે.