ઉત્તરાખંડમાં ભારે વરસાદને કારણે ચારધામ યાત્રા અને ટ્રેકિંગ પર અસર પડી છે. રવિવારે 15 હજારથી વધુ તીર્થયાત્રીઓને વિવિધ સ્થળોએ રોકવામાં આવ્યા હતા. કેદારનાથથી 1200 યાત્રિકોને સુરક્ષિત બહાર કાઢવામાં આવ્યા છે. કાલિંદી ટ્રેક સહિતના વિસ્તારોમાં ફસાયેલા પ્રવાસીઓ અને પોર્ટરોને બહાર કાઢવા 6 હેલિકોપ્ટર તૈનાત કરાયા છે. સંભવિત બચાવ સ્થળો નજીક હેલિપેડની ઓળખ કરી એનડીઆરએફ અને એસડીઆરએફની ટીમો પણ ગોઠવવામાં આવી છે. હવામાનની ગંભીર સ્થિતિને પગલે હેમકુંડ સાહિબ અને ફૂલોની ખીણ તરફ જતા પ્રવાસીઓ-શ્રદ્ધાળુઓને પણ રોકી દેવાયા છે.

પર્યટન સચિવ ધીરજ ગર્બ્યાલે જણાવ્યું હતું કે કાલિંદી ટ્રેક સહિતના કેટલાક સ્થળોએ ટ્રેકિંગ માટે ગયેલા પ્રવાસીઓ સાથે પોર્ટરો પણ ફસાયા છે. હવામાન સાફ થશે તો સોમવારે હેલિકોપ્ટરથી બચાવ કામગીરી હાથ ધરવામાં આવશે. કેદારનાથ જતા યાત્રિકોને ગૌરીકુંડ, સોનપ્રયાગ અને ગુપ્તકાશીમાં રોકવામાં આવ્યા છે, જ્યારે ગંગોત્રી-યમુનોત્રી જતા યાત્રિકોને બડકોટ, દોબાટા અને ખરાડીમાં અટકાવવામાં આવ્યા છે.

કેદારનાથ જવાના આશરે 5000 યાત્રિકોને સુરક્ષિત સ્થળોએ રોકવામાં આવ્યા છે અને 1000 યાત્રિકો કેદારનાથ ધામમાં રોકાયા છે. ગંગોત્રી-યમુનોત્રી જતા આશરે 7000 યાત્રિકો વિવિધ સ્થળોએ અટક્યા છે. ઘાંઘરિયા ગુરુદ્વારામાં 1100 યાત્રિકો, હોટલોમાં 200થી 300 યાત્રિકો અને ગોવિંદઘાટમાં આશરે 1200 યાત્રિકોને રોકવામાં આવ્યા છે. ફૂલોની ખીણ તરફ જતા 200 પ્રવાસીઓને પણ અટકાવવામાં આવ્યા છે. ચારધામ યાત્રા રવિવારે સુરક્ષાના કારણોસર સંપૂર્ણપણે બંધ રહી હતી અને ગંગોત્રી-યમુનોત્રી ધોરીમાર્ગ પણ દિવસ દરમિયાન વારંવાર બંધ રહ્યો હતો.

ઉત્તરકાશીના કાલિંદી ટ્રેક પર 18 ટ્રેકરો ફસાયા હોવાની માહિતી મળતાં વહીવટીતંત્ર સક્રિય થયું હતું. જિલ્લા કલેક્ટર પ્રશાંત આર્યએ તમામ ટ્રેકરો બેઝ કેમ્પમાં સુરક્ષિત હોવાની પુષ્ટિ કરી હતી અને તેમની સાથે સતત સંપર્ક જાળવવામાં આવી રહ્યો હોવાનું જણાવ્યું હતું. હવામાન સાફ થયા બાદ સોમવારે હેલિકોપ્ટરથી સ્થળની હવાઈ તપાસ કરવામાં આવશે. ભારે વરસાદને કારણે સિરોબગડ માર્ગ પણ દિવસભર બંધ થતો રહ્યો હતો.