મહારાષ્ટ્ર સરકારે ઍપલ અને ગૂગલને ઍપલ સ્ટોર અને ગૂગલ પ્લેસ્ટોરમાંથી ઓલા, ઉબર અને રૅપિડો આ ત્રણેય ઍપ્લિકેશન હટાવવા માટે શુક્રવારે નોટિસ મોકલી હતી. જોકે ત્રણેય કંપનીઓ દ્વારા આપવામાં આવતી અન્ય સર્વિસિસ ચાલુ રાખીને ફક્ત બાઇક અને ટૅક્સી-સર્વિસ બંધ કરી શકાય એવો વિકલ્પ હવે સરકાર વિચારી રહી છે.

મહારાષ્ટ્ર સરકારે આ ત્રણેય કંપનીઓને કાર અને રિક્ષા જેવાં વિવિધ વાહનો સર્વિસ માટે ઉપયોગમાં લેવાની પરવાનગી આપી હતી. જોકે, બાઇક અને ટૅક્સી-સર્વિસ આપવાનું લાઇસન્સ સરકારે માર્ચ મહિનામાં રદ કર્યું હતું. આ ત્રણેય કંપનીઓ કમ્પ્લાયન્સ ડૉક્યુમેન્ટ્સ રજૂ કરવામાં નિષ્ફળ જતાં તથા ગ્રીન પ્લેટ ઇલેક્ટ્રિક વ્હીકલ્સનો ઉપયોગ કરવાનું શરૂ ન કરતાં તેમની બાઇક અને ટૅક્સી-સર્વિસનું લાઇસન્સ રદ કરવામાં આવ્યું હતું.