દિલ્હીના ચર્ચિત કશ્મીરી ગેટ બસ સામૂહિક દુષ્કર્મ કેસમાં પોલીસને મહત્વના ફોરેન્સિક પુરાવા મળ્યા છે. તપાસમાં બહાર આવ્યું છે કે ઘટના સમયે બસમાં લાગેલો CCTV કેમેરા બંધ હોવાથી આરોપીઓએ દુષ્કર્મ આચર્યું હતું. જોકે ફોરેન્સિક ટીમને બસમાંથી પીડિતા અને બંને આરોપીઓના ફિંગરપ્રિન્ટ મળ્યા છે, જેનાથી હાજરીની પુષ્ટિ થઈ છે અને પોલીસ ટૂંક સમયમાં કોર્ટમાં ચાર્જશીટ રજૂ કરશે.

આ મામલો 4 ઓગસ્ટનો છે, જ્યારે એક કિશોરી નોઈડાના પરી ચોક વિસ્તારથી આ બસમાં લિફ્ટ લઈને બેઠી હતી. ત્યારબાદ બસમાં તેની સાથે સામૂહિક દુષ્કર્મની શરમજનક ઘટનાને અંજામ અપાયો હતો. ઘટના બહાર આવતાં પોલીસે તપાસ ઝડપી બનાવી સમગ્ર બસની ઊંડાણપૂર્વક ફોરેન્સિક તપાસ કરાવી હતી.

તપાસમાં જાણવા મળ્યું હતું કે બસનો CCTV કેમેરા બંધ પડ્યો હતો, તેથી કોઈ વીડિયો પુરાવો રેકોર્ડ થયો નહોતો. પોલીસનું માનવું છે કે આરોપીઓને પહેલેથી ખબર હતી કે કેમેરા ખરાબ છે અને તેમણે તેનો લાભ લીધો હતો. ફૂટેજ ન મળવા છતાં અન્ય મજબૂત પુરાવા મળ્યા છે. ફોરેન્સિક ટીમે અંદરના ભાગમાંથી સેમ્પલ લીધા હતા, પીડિતા અને બંને આરોપીઓની ફિંગરપ્રિન્ટ મળતાં હાજરી સાબિત થઈ છે.

આ ઉપરાંત પોલીસે ડ્રાઈવર કુલદીપ અને કંડક્ટર સંદીપના કપડાં જપ્ત કર્યા છે અને બસની સીટો અને સ્ટીયરીંગ વ્હીલ પરથી સેમ્પલ એકત્ર કર્યા છે, જેની તપાસ ચાલી રહી છે. સૌથી મહત્વનો DNA રિપોર્ટ બાકી છે, તે આવ્યા બાદ ભૂમિકા સ્પષ્ટ થશે અને તમામ પુરાવા બાદ મજબૂત ચાર્જશીટ રજૂ થશે.