અમેરિકાના પેન્સિલવેનિયામાં ગેરકાયદે ટેટ્રાહાઇડ્રોકેનાબિનોલ, ગાંજાના વેચાણ અને લાખો ડૉલરની કથિત નાણાં હેરફેરના કેસમાં 10 ગુજરાતીઓની ધરપકડ કરવામાં આવી છે. ધર્મેશ, મિતુલ, અંકિત, કેતન, રોશની, પલક, દિવ્યેશ, નીરવ, માધવ અને અલબીના પટેલ સામે ભ્રષ્ટ સંગઠન, પ્રતિબંધિત પદાર્થોની સપ્લાય અને વેચાણના ઈરાદે જથ્થો રાખવા સહિતના આરોપો છે. તપાસ ડિસેમ્બર 2024માં શરૂ થઈ હતી.

કોર્ટ દસ્તાવેજો મુજબ, જૂથ અનેક કંપનીઓ મારફતે વેસ્ટમોરલેન્ડ અને એલેગેની કાઉન્ટીના ગોડાઉનથી સમગ્ર પેન્સિલવેનિયામાં ઉત્પાદનો પહોંચાડતું હતું. સપ્ટેમ્બર 2025ના દરોડામાં લગભગ 1.4 લાખ વસ્તુઓ મળી હતી, જેમાં પ્લમના ગોડાઉનમાંથી 12 હજાર વસ્તુઓ, ગમીઝ, ગેરકાયદે વેપ અને ગાંજો સામેલ હતા. અંડરકવર તપાસમાં ગોડાઉનમાંથી સીધી ખરીદી પણ કરાઈ હતી.

ડ્રગ્સના નાણાંને વિવિધ કંપનીઓ અને નાણાકીય સંસ્થાઓમાં ફેરવતા નેટવર્કમાં આરોપીઓ સાથે જોડાયેલી કંપનીઓના 37 ખાતાં હોવાનું તપાસમાં સામે આવ્યું. જાન્યુઆરીથી મે 2025 દરમિયાન એક ખાતામાં અંદાજે 2 કરોડ ડૉલર, એટલે કે રૂ. 166 કરોડથી વધુના વ્યવહારો થયા હતા. તપાસમાં વેસ્ટમોરલેન્ડની એક મહિલાએ જણાવ્યું કે વેપ શોપમાંથી મળેલી ટેટ્રાહાઇડ્રોકેનાબિનોલ કેન્ડી ખાધા બાદ તેની 4 વર્ષની પુત્રીને હોસ્પિટલમાં દાખલ કરવી પડી હતી.

દિવ્યેશ, પલક અને અલબીના સહિત કેટલાક આરોપીઓ સામે ગંભીર સંગઠનાત્મક આરોપો છે, જ્યારે માધવ, નીરવ, અંકિત, પલક અને દિવ્યેશને વેસ્ટમોરલેન્ડ કાઉન્ટી જેલમાં મોકલાયા હતા. 1 લાખથી 5 લાખ ડૉલરના બોન્ડ ન ભરતાં તેઓ કસ્ટડીમાં છે, જ્યારે અલબીના, કેતન, ધર્મેશ અને રોશની અનસિક્યોર્ડ બોન્ડ પર મુક્ત થયા છે. કેસની પ્રાથમિક સુનાવણી 23 સપ્ટેમ્બરે છે; દસ્તાવેજોમાં મુનહાલના માધવ-નીરવ, ક્રેનબેરીના દિવ્યેશ-પલક, પિટ્સબર્ગની અલબીના, બેન્સાલેમના ધર્મેશ-કેતન અને હન્ટિંગડન વેલીની રોશની સાથે અનિલ પટેલનું પણ નામ છે.