નવી દિલ્હી: એન્ફોર્સમેન્ટ ડિરેક્ટોરેટ (ED) એ આજે બુધવારે સવારે આમ આદમી પાર્ટી (AAP) ના રાજ્યસભા સાંસદ અશોક મિત્તલ અને તેમના પુત્ર સાથે જોડાયેલા અનેક ઠેકાણાઓ પર દરોડા પાડ્યા હતા. સૂત્રો દ્વારા જાણવા મળ્યું હતું કે આ કાર્યવાહી લવલી પ્રોફેશનલ યુનિવર્સિટી (LPU) સાથે જોડાયેલા ફંડમાં કથિત નાણાકીય ગેરરીતિઓ અને વિદેશી મુદ્રા કાયદાના ઉલ્લંઘનને લઈને કરાઈ હતી.

EDની ટીમ યુનિવર્સિટી સાથે સંકળાયેલા નાણાકીય વ્યવહારો, દાન અને રોકાણની વિગતોની તપાસ કરી રહી છે. ખાસ કરીને, વિદેશી વિનિમય વ્યવહારોમાં FEMA કાયદાનું પાલન થયું કે નહીં તે દિશામાં તપાસ ચાલી રહી છે. અશોક મિત્તલના પુત્રના રહેઠાણ અને ઓફિસ પર પણ કાર્યવાહી હાથ ધરાઈ છે, જ્યાંથી ડિજિટલ પુરાવા અને મહત્વના દસ્તાવેજો જપ્ત કરવામાં આવ્યા હોવાનું કહેવામાં આવે છે.

આ દરોડા બાદ રાજકીય માહોલ ગરમાયો છે. AAP સંયોજક અરવિંદ કેજરીવાલે કેન્દ્ર સરકાર પર આકરા પ્રહારો કરતા કહ્યું કે, પંજાબમાં ચૂંટણીને ધ્યાનમાં રાખીને આવી કાર્યવાહી કરવામાં આવી રહી છે. તેમના જણાવ્યા મુજબ, "ભાજપ એજન્સીઓનો દુરુપયોગ કરી રહી છે, પરંતુ પંજાબના લોકો તેનો જવાબ આપશે."  AAPના નેતા સંજય સિંહે પણ આ કાર્યવાહીનો વિરોધ કર્યો છે. તેમણે સોશિયલ મીડિયા પર લખ્યું કે, જ્યાં જ્યાં ચૂંટણી આવે છે ત્યાં ભાજપ પહેલા તપાસ એજન્સીઓને મોકલે છે. તેમણે આ સમગ્ર ઘટનાને રાજકીય બદલો ગણાવ્યો છે.