ચૂંટણી પંચે ઉત્તર પ્રદેશની 10 અને ઉત્તરાખંડની 1 રાજ્યસભા બેઠક માટે ચૂંટણી કાર્યક્રમ જાહેર કર્યો છે. તમામ 11 બેઠકો માટે 16 ઓક્ટોબરે મતદાન થશે અને તે જ દિવસે સાંજે પરિણામ જાહેર કરવામાં આવશે. ઉત્તર પ્રદેશની 10 બેઠકોના વર્તમાન સભ્યોનો કાર્યકાળ 25 નવેમ્બરે પૂર્ણ થઈ રહ્યો હોવાથી ચૂંટણી યોજાઈ રહી છે.

યુપીની 10 બેઠકોમાંથી હાલમાં 8 ભાજપ, 1 સમાજવાદી પાર્ટી અને 1 બસપા પાસે છે. કાર્યકાળ પૂર્ણ કરનારા સભ્યોમાં કેન્દ્રીય મંત્રી હરદીપ સિંહ પુરી, પૂર્વ ડીજીપી બ્રજલાલ, સીમા દ્વિવેદી, નીરજ શેખર, ગીતા શાક્યા, અરૂણ સિંહ, બી.એલ. વર્મા, રામગોપાલ યાદવ અને રામજી ગૌતમનો સમાવેશ થાય છે. દિનેશ શર્માએ અંદમાન-નિકોબારના એલજી બન્યા બાદ રાજીનામું આપતાં એક બેઠક ખાલી છે.

યુપી વિધાનસભાની 403 બેઠકોમાંથી 6 ધારાસભ્યોના નિધન બાદ 397 ધારાસભ્યો મતદાન કરશે. એક રાજ્યસભા બેઠક માટે આશરે 37 પ્રથમ પસંદગીના મતો જરૂરી રહેશે. બસપા પાસે એક પણ ધારાસભ્ય ન હોવાથી વર્તમાન સાંસદનો કાર્યકાળ પૂરો થતાં રાજ્યસભામાં તેનું પ્રતિનિધિત્વ પણ શૂન્ય થશે.

સંખ્યાબળ મુજબ સમાજવાદી પાર્ટી પાસે 101 ધારાસભ્યો હોવાથી તે 2 બેઠકો માટે જરૂરી મત મેળવી શકે છે અને વધારાના મત પણ રહેશે. ભાજપ પાસે પોતાના 256 અને સહયોગી પક્ષોના 33 મળીને 289 ધારાસભ્યો છે. આ સંખ્યાબળના આધારે ભાજપ 7 બેઠકો માટે જરૂરી મતો મેળવી શકે છે.