અમેરિકન ગુપ્તચર સંસ્થા એફબીઆઈ (FBI)ના ભારતીય મૂળના ડિરેક્ટર કાશ પટેલે પોતાની ગર્લફ્રેન્ડ અને જાણીતી અમેરિકન કન્ટ્રી સિંગર એલેક્સિસ વિલ્કિન્સ સાથે સગાઈ કરી લીધી છે. બંનેએ સોશિયલ મીડિયા પ્લેટફોર્મ ‘X’ પર સગાઈની સુંદર તસવીર શેર કરીને ચાહકોને આ ખુશખબર આપી છે. એલેક્સિસ વિલ્કિન્સે પોતાની સગાઈની વીંટી દર્શાવતી તસવીર પોસ્ટ કરતાં રમૂજી અંદાજમાં લખ્યું કે હવે તેમણે કાયદાને વચ્ચે સામેલ કરી લીધો છે. જ્યારે કાશ પટેલે આ પોસ્ટ રીશેર કરીને હાર્ટ અને રિંગ ઈમોજી સાથે પોતાનો પ્રેમ વ્યક્ત કર્યો હતો. આ તસવીરો સોશિયલ મીડિયા પર ઝડપથી વાયરલ થઈ રહી છે અને દુનિયાભરમાંથી બંનેને શુભેચ્છાઓ મળી રહી છે.  એક ઇન્ટરવ્યુમાં એલેક્સિસે જણાવ્યું હતું કે તેમને ઉંમરના તફાવતથી કોઈ ફરક નથી પડતો. પ્રથમ મુલાકાતમાં જ તેમને કાશ પટેલની પ્રામાણિકતા ખૂબ પસંદ આવી ગઈ હતી. તેમણે કહ્યું હતું કે કાશ પટેલ વાસ્તવિક જીવનમાં જેવા છે તેવા જ રહે છે, અને તેમના આ જ મૂલ્યો, ચરિત્ર અને સાદગી તેમને અન્ય લોકોથી અલગ બનાવે છે. કાશ પટેલ ભારતીય મૂળના અમેરિકન વકીલ અને વરિષ્ઠ અધિકારી છે. તેઓ અમેરિકન રાજકારણ અને રાષ્ટ્રીય સુરક્ષા ક્ષેત્રે ખૂબ પ્રભાવશાળી અને ચર્ચિત ચહેરો ગણાય છે. કાશ પટેલ અમેરિકન રાષ્ટ્રપતિ ડોનાલ્ડ ટ્રમ્પના અત્યંત નજીકના અને વિશ્વાસુ સહયોગી માનવામાં આવે છે. એફબીઆઈ વડા બન્યા બાદથી જ કાશ પટેલ અને એલેક્સિસ વિલ્કિન્સની જોડી વૈશ્વિક મીડિયામાં ચર્ચાનું કેન્દ્ર રહી છે.