લી.યુ.યાંગ (મધ્ય ચીન) : મધ્ય ચીનના હુનાન પ્રાંત સ્થિત લી-યુ-યાંગ નામક શહેરમાં મંગળવારે એક ફટાકડા ફેકટરીમાં અચાનક વિસ્ફોટ થતાં ૨૧ જણના સ્થળ ઉપર જ મૃત્યુ થયા છે. જયારે ૬૦થી વધુને ગંભીર દાહ થયા છે. આ પ્રચંડ તડાફડી પછી ૫૦૦ જેટલા બચાવ કર્મીઓને બચાવ માટે કાર્યરત કરી દેવાયા છે અને આ ફેકટરીની આજુબાજુ રહેલા મકાનોના રહેવાસીઓને પણ ઘરો ખાલી કરી સલામત સ્થળે પહોંચી જવા તાકીદ કરવામાં આવી છે. મધ્ય ચીન સ્થિત આ લી-યુ-યાંગ શહેરમાં આવેલી આ હ્યુ-યા-શેંગ ફાયર વર્કસ મેન્યુફેકચરીંગ એન્ડ ડીસપ્લે કંપની ફટાકડા બનાવનાર મોટી કંપનીઓ પૈકીની એક છે. તેના ગોડાઉનના બે ખંડોમાં અત્યારે ફટાકડા બનાવવા માટેનો કાચો-દારૂગોળો પડેલો છે. પરંતુ સદનસીબે તે ખંડો સુધી આગ પ્રસરી ન હતી. આ માહિતી આપતા ચીનની સત્તાવાર સરકારી સમાચાર સંસ્થા શીન-હુઆ જણાવે છે કે, આ વિસ્ફોટ પછી ધૂમાડાના ગોટા ઉડતા દૂર દૂર સુધી દેખાતા હતા. ધડાકો એટલો પ્રચંડ હતો કે આજુબાજુનાં ગામોનાં મકાનોનાં બારી-બારણાનાં કાચ પણ તૂટી ગયા હતા.