મધ્ય-પૂર્વના દેશોમાં સર્જાયેલા યુદ્ધ અને ઊર્જા સંકટને પહોંચી વળવા માટે કેન્દ્ર સરકારે ડીઝલ અને કમર્શિયલ LPGમાં ભેળસેળ કરવાની દિશામાં મહત્વનું પગલું ભર્યું છે. ક્રૂડ ઓઈલ પરની નિર્ભરતા ઘટાડવા માટે ભારતીય માનક બ્યુરો (BIS) ગુણવત્તાના નવા માપદંડો તૈયાર કરી રહ્યું છે. સરકાર ડીઝલમાં 10 ટકા આઈસોબ્યૂટાઈલ આલ્કોહોલ (IBA) અને કમર્શિયલ LPGમાં ડાઈમિથાઈલ ઈથર (DME)ના મિશ્રણને મંજૂરી આપે તેવી પૂરેપૂરી શક્યતા છે.

સૂત્રોના જણાવ્યા અનુસાર BIS આ નવા માપદંડો 15 જૂન સુધીમાં જાહેર કરી શકે છે. IBA એક જ્વલનશીલ પ્રવાહી છે જે અનાજમાંથી બનાવવામાં આવે છે. આ નિર્ણયથી આયાતી તેલ પરનો ખર્ચ ઘટશે અને ખેડૂતોને પણ ફાયદો થશે. કમર્શિયલ LPG માટે DME મિશ્રણના માપદંડોને અંતિમ રૂપ આપી દેવાયું છે, જેનું નોટિફિકેશન 15 મે 2026 સુધીમાં આવી શકે છે. નોંધનીય છે કે આ મિશ્રણ માત્ર હોટેલ અને ઉદ્યોગો માટે વપરાતા કમર્શિયલ સિલિન્ડરમાં જ થશે, ઘરેલુ વપરાશના સિલિન્ડરમાં હાલ કોઈ ફેરફાર કરાશે નહીં.