હિમાચલ પ્રદેશના ચંબા જિલ્લામાં શનિવારે 8 ઓગસ્ટની સવારે ગંભીર માર્ગ અકસ્માત સર્જાયો હતો. તીસા-બૈરાગઢ રોડ પર ચાબુજ વળાંક પાસે બૈરાગઢથી ચંબા તરફ જઈ રહેલી મુસાફરોથી ખીચોખીચ ભરેલી ખાનગી બસ ચાલકે કાબૂ ગુમાવતા અચાનક પલટી ગઈ હતી. આ ગોઝારી ઘટનામાં 8 લોકોના મોત નીપજ્યા હતા અને અનેક લોકો ગંભીર રીતે ઘાયલ થયા હતા. પ્રાથમિક માહિતી મુજબ ઘટના સમયે બસમાં અંદાજે 22 મુસાફરો સવાર હતા.

અકસ્માત બાદ ઘટનાસ્થળે અફડાતફડીનો માહોલ સર્જાયો હતો. જાણ થતાં જ આસપાસના ગ્રામજનો અને સ્થાનિક લોકો મોટી સંખ્યામાં એકઠા થઈ ગયા હતા અને તાત્કાલિક રાહત તથા બચાવ કામગીરી હાથ ધરી હતી. પોલીસ અને વહીવટી તંત્રની ટીમ પણ તરત જ સ્થળ પર દોડી ગઈ હતી અને ઇજાગ્રસ્તોને સારવાર માટે નજીકની હોસ્પિટલમાં ખસેડવામાં આવ્યા હતા.

ચંબાના પોલીસ અધિક્ષક વિજય સકલાનીએ અકસ્માતની પુષ્ટિ કરી હતી અને જણાવ્યું હતું કે 8 મુસાફરોના મોત થયા છે અને ઘાયલોને હોસ્પિટલે પહોંચાડવામાં આવ્યા છે. અકસ્માતનું ચોક્કસ કારણ હજુ જાણી શકાયું નથી. પોલીસ ટીમે સ્થળ પર પહોંચીને વધુ તપાસ હાથ ધરી છે અને તપાસ પૂર્ણ થયા બાદ જ સંપૂર્ણ વિગતવાર માહિતી સ્પષ્ટ થશે.