ભારતીય ઈકોનોમી 2031 સુધીમાં 7 ટ્રિલિયન ડૉલરે પહોંચશે તેવી ધારણા રેટિંગ એજન્સી ક્રિસિલ દ્વારા વ્યક્ત કરવામાં આવી છે. વર્ષ 2025થી 2031 વચ્ચે મધ્યમ ગાળામાં આર્થિક વિકાસ દર સરેરાશ 6.7 ટકા રહેવાનાં અંદાજ સાથે આ ધારણા વ્યક્ત કરાઈ છે. જે કોરોનાની મહામારી પહેલાનાં દાયકામાં રહેલા 6.6 ટકાનાં ગ્રોથ રેટની સમકક્ષ રહેશે તેવું મનાય છે.

ખાસ કરીને મૂડીખર્ચમાં વધારો તેમજ ઉત્પાદકતામાં વૃદ્ધિ થવાને કારણે અર્થતંત્રમાં તેજી આવશે. ક્રિસિલ દ્વારા ચાલુ નાણાકીય વર્ષમાં GDP ગ્રોથ રેટ 6.8 ટકા રહી શકે છે. જો કે ઉંચો વ્યાજ દર અને ધિરાણનાં કડક નિયમોને કારણે શહેરી માંગને અસર થઈ શકે છે. વિકાસ માટે ઓછા રાજકીય પ્રોત્સાહનને કારણે ગ્રોથને અસર થઈ શકે છે.

ફુગાવામાં ઘટાડાની સંભાવના
ગ્રાહક ભાવ આધારિત ફુગાવો (CPI) 2024-25માં અગાઉનાં વર્ષનાં 5.4 ટકાથી ઘટીને સરેરાશ 4.5 ટકા રહેશે તેવું માનવામાં આવે છે. ખાસ કરીને ખાદ્ય ફુગાવો ઓછો રહેવાને કારણે ફુગાવો ઘટી શકે છે. ગ્રોથ અને ફુગાવાની ધારણાને હવામાનની અનિશ્ચિતતા તેમજ ભૂભૌગોલિક સ્થિતિ અસર કરી શકે છે. આ વર્ષે ખરીફ મોસમમાં વિવિધ પાકનું વાવેતર વધ્યું છે. અલબત્ત કમોસમી વરસાદ અને ચોમાસામાં પડેલા વધુ વરસાદની અસરો કેટલી રહે તે નક્કી નથી.