અમેરિકાના હવાઈ હુમલાના જવાબમાં ઇરાનના રિવોલ્યુશનરી ગાર્ડ કોર્પ્સે રવિવારે કુવૈત અને બહેરિનને નિશાન બનાવી ડ્રોન અને મિસાઇલ હુમલા કર્યા હોવાનું જણાવ્યું છે. સાથે જ ઇરાને ચેતવણી આપી છે કે જો અમેરિકા તરફથી સૈન્ય કાર્યવાહી ચાલુ રહેશે તો બંને દેશો વચ્ચે ચાલી રહેલી શાંતિ મંત્રણા સંપૂર્ણપણે બંધ કરી દેવામાં આવશે. આ ઘટનાથી બંને દેશો વચ્ચેનો તણાવ વધુ વધી ગયો છે.

હોર્મુઝ જળમાર્ગ નજીક એક જહાજ પર થયેલા હુમલા બાદ અમેરિકાએ ઇરાનના સૈન્ય મથકો પર કાર્યવાહી કરી હતી. અમેરિકી સૈન્યના જણાવ્યા મુજબ રડાર પ્રણાલી, સંચાર વ્યવસ્થા, હવાઈ સુરક્ષા તંત્ર, ડ્રોન ભંડાર અને બારૂદી સુરંગ પાથરવાની ક્ષમતાને નિશાન બનાવવામાં આવી હતી. ત્યારબાદ ડોનાલ્ડ ટ્રમ્પે ચેતવણી આપી હતી કે જો સ્થિતિ વધુ વણસશે તો અમેરિકા સૈન્ય કાર્યવાહી માટે મજબૂર બનશે અને તેના ગંભીર પરિણામો આવશે.

આ સમગ્ર વિવાદ વચ્ચે હોર્મુઝ જળમાર્ગ ફરી ચર્ચાના કેન્દ્રમાં આવ્યો છે. ખાડી વિસ્તારમાં જહાજોની અવરજવર સરળ બને તે માટે ઓમાન તરફના જળમાર્ગનો વિસ્તાર કરવામાં આવ્યો છે. અમેરિકા અને ઇરાન વચ્ચે થયેલી વચગાળાની સમજૂતીમાં પણ હોર્મુઝ જળમાર્ગમાંથી જહાજોની અવરજવર ફરી શરૂ કરવાનો મુદ્દો સામેલ છે. જોકે, સંયુક્ત રાષ્ટ્રના સમર્થનથી તૈયાર કરાયેલા આ માર્ગ પરથી પસાર થતાં જહાજો પર ઇરાને બે વખત હુમલા કર્યા હોવાનો દાવો કરવામાં આવ્યો છે. ઇરાનનું કહેવું છે કે આ મહત્વના જળમાર્ગ પર તેનું જ નિયંત્રણ હોવું જોઈએ, જ્યારે અમેરિકા અને ખાડીના અરબ દેશો તેનો વિરોધ કરી રહ્યા છે.

વિશ્વના તેલ અને કુદરતી ગેસના મોટા હિસ્સાની હેરફેર માટે હોર્મુઝ જળમાર્ગ અત્યંત મહત્વનો માનવામાં આવે છે. ઇરાનના રિવોલ્યુશનરી ગાર્ડ કોર્પ્સે જણાવ્યું છે કે જો યુદ્ધવિરામનું ઉલ્લંઘન થશે તો શાંતિ મંત્રણાનો કોઈ અર્થ રહેશે નહીં અને તેને સંપૂર્ણપણે બંધ કરી દેવામાં આવશે. આ ઘટનાક્રમને પગલે પશ્ચિમ એશિયામાં ફરી એકવાર તણાવપૂર્ણ સ્થિતિ સર્જાઈ છે.