સોશિયલ મીડિયા પર પ્રધાનમંત્રી નરેન્દ્ર મોદી અને કેન્દ્રીય મંત્રી પીયૂષ ગોયલના નામે વાયરલ થયેલા વીડિયો AI આધારિત ડીપફેક હોવાનું કેન્દ્ર સરકારે સ્પષ્ટ કર્યું છે. પ્રેસ ઇન્ફોર્મેશન બ્યુરો (PIB)ની ફેક્ટ ચેક યુનિટે જણાવ્યું છે કે વીડિયોમાં દર્શાવવામાં આવેલા નિવેદનો વાસ્તવિક નથી અને લોકોને ગેરમાર્ગે દોરવાના હેતુથી મૂળ વીડિયો તથા ઓડિયોમાં ડિજિટલ છેડછાડ કરવામાં આવી છે. PIBએ લોકોને આવા વીડિયો પર વિશ્વાસ ન કરવા અને કોઈપણ માહિતી શેર કરતા પહેલાં તેની સત્યતા ચકાસવાની અપીલ કરી છે.

તાજેતરમાં વાયરલ થયેલા વીડિયોમાં પ્રધાનમંત્રી નરેન્દ્ર મોદી અને પીયૂષ ગોયલ વિદ્યાર્થીઓ તથા પ્રદર્શનકારીઓને ધમકી આપતા હોય તેવો દાવો કરવામાં આવ્યો હતો. જોકે, તપાસમાં જાણવા મળ્યું કે મૂળ વીડિયોમાં AI ટેક્નોલોજીનો ઉપયોગ કરીને નકલી અવાજ અને સંદેશ ઉમેરવામાં આવ્યા હતા. ચહેરા અસલી હોવા છતાં તેમાં સંભળાતા શબ્દો અને નિવેદનો બનાવટી હોવાનું PIBએ જણાવ્યું છે.

PIB ફેક્ટ ચેક યુનિટે સ્પષ્ટ કર્યું કે પ્રધાનમંત્રી કે પીયૂષ ગોયલે આવા કોઈ નિવેદન આપ્યા નથી અને વાયરલ ક્લિપ્સ સંપૂર્ણપણે ભ્રામક છે. કેન્દ્ર સરકારે દાવો કર્યો છે કે કેટલાક વિદેશી પ્રચારક એકાઉન્ટ્સ આવા વીડિયો શેર કરીને દેશમાં ગેરસમજ, અવિશ્વાસ અને અફવાઓ ફેલાવવાનો પ્રયાસ કરી રહ્યા છે.

ફેક્ટ ચેક દરમિયાન જાણવા મળ્યું કે પેપર લીક મુદ્દે પ્રધાનમંત્રીના એક વાસ્તવિક સંબોધનના વીડિયોમાં નવો ઓડિયો ઉમેરીને તેને બદલવામાં આવ્યો હતો. તેવી જ રીતે, સંસદ બહાર પીયૂષ ગોયલના નિવેદનને પણ ડિજિટલ રીતે સંપાદિત કરીને ભ્રામક રીતે રજૂ કરવામાં આવ્યું હતું. PIBએ ભારપૂર્વક જણાવ્યું કે આવા વીડિયો મૂળ ભાષણનું સાચું પ્રતિનિધિત્વ કરતા નથી અને સોશિયલ મીડિયા પર વાયરલ થતી દરેક ક્લિપને ચકાસ્યા વગર સાચી માનવી જોઈએ નહીં.