મહાકુંભ હવે અંતિમ ચરણમાં છે. મહાશિવરાત્રી પર અંતિમ અમૃત સ્નાનની સાથે મહાકુંભનું સમાપન થશે. જેના લીધે પ્રયાગરાજમાં ભારે ભીડ ઉમટી પડવાની શક્યતા છે. આ સંકેતને ધ્યાનમાં રાખતાં પોલીસ અને તંત્રે આકરી તૈયારીઓ કરી લીધી છે. રેલવેએ પણ સંપૂર્ણ તૈયારીઓ કરી છે. આજે સાંજે ચાર વાગ્યાથી કુંભ મેળાના ક્ષેત્ર નો વ્હિકલ ઝોન બનશે. જ્યારે 26 ફેબ્રુઆરીના મહાશિવરાત્રીના લીધે સાંજે છ વાગ્યાથી આખા પ્રયાગરાજમાં નો વ્હિકલ ઝઓન લાગુ કરવામાં આવશે. માત્ર આવશ્યક વસ્તુઓ લઈ જતાં વાહનોની છૂટ આપશે. ભીડને જોતાં રેલવે સ્ટેશનો પર હોલ્ડિંગ એરિયા બનાવવામાં આવ્યા છે. જ્યાં શ્રદ્ધાળુઓને રોકાણ કરવાની સુવિધા મળશે.

પ્રયાગરાજ મહાકુંભમાં અત્યાર સુધીમાં 63 કરોડથી વધુ શ્રદ્ધાળુઓએ સંગમમાં આસ્થાની ડૂબકી લગાવી છે. અહેવાલો છે કે, મહાશિવરાત્રીના સ્નાનમાં ફરી એકવાર મહાકુંભમાં ભક્તોની ભીડના તમામ રેકોર્ડ તૂટી શકે છે. અગાઉ નાસભાગની ઘટનાને ધ્યાનમાં રાખતાં જિલ્લા વહીવટીતંત્ર અને ન્યાયી વહીવટીતંત્ર આ માટે સંપૂર્ણ રીતે સજ્જ બન્યું છે સીએમ યોગી આદિત્યનાથ પોતે મોનીટરીંગ કરી રહ્યા છે અને જરૂરી નિર્દેશ આપી રહ્યા છે. તાજેતરમાં, મુખ્ય સચિવ અને ડીજીપીએ સમીક્ષા બેઠક યોજી હતી અને તૈયારીઓની સમીક્ષા કરી હતી.

મહાશિવરાત્રી અને મહાકુંભના અંતિમ સ્નાન માટે ભક્તોનું ઘોડાપુર પ્રયાગરાજ પહોંચી રહ્યું છે. સોમવારે સાંજથી રેલવે સ્ટેશન અને બસ સ્ટેન્ડથી સંગમ તરફ જતાં માર્ગો પર વાહનોની લાંબી કતારો લાગી હતી. ભક્તો માટે ત્રણ ડઝન પાર્કિંગની જગ્યાઓ બનાવવામાં આવી છે.

મહાશિવરાત્રીના સ્નાન માટે ભક્તોની સરળ અવરજવર અને સુરક્ષા માટે મેળાના વિસ્તારમાં ટ્રાફિક ડાયવર્ઝન અને પાર્કિંગની વ્યવસ્થા કરવામાં આવી છે. 25 ફેબ્રુઆરીના રોજ સવારે 8 વાગ્યાથી 27 ફેબ્રુઆરીના રોજ સવારે 8 વાગ્યા સુધી મહાકુંભ મેળાના વિસ્તારમાં વહીવટી અને ઈમરજન્સી વાહનો સિવાય તમામ પ્રકારના વાહનોની અવરજવર પર પ્રતિબંધ મુકવામાં આવ્યો છે.

જૌનપુર બાજુથી આવતા વાહનો માટે પાર્કિંગ - સુગર મિલ પાર્કિંગ, પૂરે સુરદાસ પાર્કિંગ ગારાપુર રોડ, સમયમય મંદિર કાચર પાર્કિંગ, બદરા સૌનૌટી રહીમાપુર રોડ ઉત્તર/દક્ષિણ પાર્કિંગ. જૌનપુર બાજુથી આવતા ભક્તો તેમના વાહનો પાર્ક કરીને જૂના જીટી રોડ દ્વારા મેળા વિસ્તારમાં જઈ શકે છે.

મહુઆ બાગ પોલીસ સ્ટેશન ઝુસી પાર્કિંગ એટલે કે અખાડા પાર્કિંગ, સરસ્વતી પાર્કિંગ ઝુસી રેલ્વે સ્ટેશન, નાગેશ્વર મંદિર પાર્કિંગ, જ્ઞાન ગંગા ઘાટ છટનાગ પાર્કિંગ, શિવ મંદિર ઉસ્તાપુર મહમુદાબાદ પાર્કિંગ. વારાણસી તરફથી આવતા ભક્તો આ પાર્કિંગ સ્થાનોથી છટનાગ રોડ થઈને મેળા વિસ્તારમાં જઈ શકે છે.

દેવરાખ ઉપહાર પાર્કિંગ ઉત્તર/દક્ષિણ, ટેન્ટ સિટી પાર્કિંગ મદનુઆ/માવૈયા/દેવરાખ, ઓમનેક્સ સિટી પાર્કિંગ, ગાઝિયા પાર્કિંગ ઉત્તર/દક્ષિણ. મિર્ઝાપુર તરફથી આવતા ભક્તો અરેલ ડેમ રોડથી મેળા વિસ્તારમાં પ્રવેશી શકશે.

અધિકારીઓએ અપીલ કરી છે કે ભક્તોએ તેમના પ્રવેશ સ્થાનના આધારે નજીકના નિયુક્ત ઘાટ પર જ સ્નાન કરવું જોઈએ. દક્ષિણ ઝુંસી માર્ગેથી આવતા લોકોએ અરેલ ઘાટનો ઉપયોગ કરવો જોઈએ, જ્યારે ઉત્તર ઝુંસી માર્ગથી આવતા લોકોએ હરિશ્ચંદ્ર ઘાટ અને જૂના જીટી ઘાટ તરફ જવું જોઈએ. પરેડ વિસ્તારમાં પ્રવેશ કરનારાઓને ભારદ્વાજ ઘાટ, નાગવાસુકી ઘાટ, મોરી ઘાટ, કાલી ઘાટ, રામ ઘાટ અને હનુમાન ઘાટ તરફ જવા સૂચના આપવામાં આવી છે. અરેલ પ્રદેશમાંથી આવતા ભક્તોએ સ્નાન માટે અરેલ ઘાટનો ઉપયોગ કરવો જોઈએ.

દિલ્હી-હાવડા રેલ્વે માર્ગ પરના સૌથી વ્યસ્ત રેલ્વે સ્ટેશનોમાંના એક પંડિત દીનદયાળ ઉપાધ્યાય જંકશન (મુગલસરાય)માં પણ મહાકુંભ દરમિયાન ભારે ભીડ જોવા મળી છે. અંતિમ સ્નાન માટે સ્ટેશન પર હોલ્ડિંગ એરિયા બનાવવામાં આવ્યા છે. ભક્તો અહીં રહી શકે છે. બીજી તરફ, નવી દિલ્હી રેલ્વે સ્ટેશન પર તાજેતરની નાસભાગ બાદ સુરક્ષા વ્યવસ્થાની સાથે ટિકિટ કાઉન્ટર અને ઓટોમેટેડ ટિકિટ વેન્ડિંગ મશીનની સંખ્યામાં પણ વધારો કરવામાં આવ્યો છે.

રેલવેના જણાવ્યા અનુસાર, વારાણસી રેલવે સ્ટેશન પર મુસાફરોને રહેવા માટે બે સ્પેશિયલ પેસેન્જર શેલ્ટર બનાવવામાં આવ્યા છે. દરેકમાં 5000 મુસાફરોની ક્ષમતા છે. આ સિવાય બિહાર, અયોધ્યા અને પ્રયાગ જતા મુસાફરો માટે ત્રણ વધારાના હોલ્ડિંગ એરિયા તૈયાર કરવામાં આવ્યા છે, જેની સંયુક્ત ક્ષમતા 10000 મુસાફરોની છે. આ આશ્રયસ્થાનોમાં પાણી, વીજળી, મોબાઈલ ચાર્જિંગ પોઈન્ટ, હંગામી શૌચાલય, તબીબી સુવિધાઓ અને ભોજનની વ્યવસ્થા કરવામાં આવી છે.