સમાજવાદી પાર્ટીના નેતા આઝમ ખાનના અનેક ઠેકાણાઓ પર એન્ફોર્સમેન્ટ ડિરેક્ટોરેટે સામૂહિક દરોડાની કાર્યવાહી હાથ ધરી છે. ઈડીની આ કાર્યવાહી જૌહર યુનિવર્સિટીના નિર્માણમાં કાળા નાણાના કથિત ઉપયોગને લઈને નોંધાયેલા કેસ સાથે સંબંધિત છે. આઝમ ખાન વિરુદ્ધ નોંધાયેલા અનેક ડઝન કેસોની યાદી ઈડી સાથે શેર કરવામાં આવી હોવાનું જાણવા મળ્યું છે.

મળતી માહિતી મુજબ જૌહર યુનિવર્સિટી અને તેની સાથે જોડાયેલા ટ્રસ્ટ પર પણ દરોડાની કાર્યવાહી કરવામાં આવી રહી છે. આઝમ ખાનના રામપુર, સહારનપુર અને દિલ્હી સહિત કુલ 10 ઠેકાણાઓ પર ઈડીની કાર્યવાહી ચાલી રહી છે. તપાસ એજન્સીની ટીમો વિવિધ સ્થળોએ દસ્તાવેજો અને અન્ય મહત્વપૂર્ણ પુરાવાઓની તપાસ કરી રહી છે.

ઈડી દ્વારા આ દરોડાની કાર્યવાહી પ્રિવેન્શન ઓફ મની લોન્ડરિંગ એક્ટ હેઠળ કરવામાં આવી રહી છે. તપાસ એજન્સીની ટીમો આઝમ ખાનના નાણાકીય વ્યવહારો, નાણાકીય ગેરરીતિઓ અને શંકાસ્પદ ફંડિંગની તપાસના સંદર્ભમાં આ કાર્યવાહી કરી રહી છે.

ઈડીની ટીમોએ મુખ્યત્વે આઝમ ખાનના ડ્રીમ પ્રોજેક્ટ મૌલાના મોહમ્મદ અલી જૌહર યુનિવર્સિટી અને તેની સાથે જોડાયેલા મૌલાના મોહમ્મદ અલી જૌહર ટ્રસ્ટના પરિસરો તથા તેના હોદ્દેદારોના રામપુર સ્થિત નિવાસસ્થાનો પર તપાસ હાથ ધરી છે. આ ઉપરાંત જૌહર યુનિવર્સિટી પરિસરમાં પણ કેન્દ્રીય સુરક્ષા દળોની હાજરી વચ્ચે દસ્તાવેજો અને ડિજિટલ પુરાવાઓની તપાસ કરવામાં આવી રહી છે.