ઇ-ફાર્મસી પ્લેટફોર્મ્સ દ્વારા દવાઓનું ઓનલાઇન વેચાણ અને ભારે ડિસ્કાઉન્ટના વિરોધમાં આજે 'ઓલ ઇન્ડિયા ઓર્ગેનાઇઝેશન ઓફ કેમિસ્ટ્સ એન્ડ ડ્રગિસ્ટ્સ' તરફથી 24 કલાકની દેશવ્યાપી હડતાળની જાહેરાત કરવામાં આવી છે. સંગઠનનો દાવો છે કે આ વિરોધ પ્રદર્શન હેઠળ દેશભરના આશરે 15 લાખથી વધુ કેમિસ્ટ અને ડ્રગિસ્ટ પોતાની દુકાનો બંધ રાખશે. જોકે, દર્દીઓને મુશ્કેલીથી બચાવવા માટે કટોકટીની દવાઓનો પુરવઠો પૂરો પાડવા માટે ખાસ વ્યવસ્થા કરવામાં આવી છે.

સંગઠનનું કહેવું છે કે ઓનલાઇન દવાઓના અનિયંત્રિત વેચાણના કારણે પરંપરાગત મેડિકલ સ્ટોર્સના વ્યવસાયને માઠી અસર થઈ રહી છે અને તેનાથી દર્દીઓની સુરક્ષા સામે પણ જોખમ વધી શકે છે. આ જ કારણોસર દેશભરના 15 લાખથી વધુ દવા વિક્રેતાઓ આ હડતાળમાં જોડાશે અને પોતાની દુકાનો બંધ રાખીને વિરોધ પ્રદર્શિત કરશે.