ગાંધીનગરમાં મોટો ફેરફાર કરાયો છે. અત્યાર સુધી પોલીસ અને એમ્બ્યુલન્સ માટે 112 પર કોલ કરતા ઈમરજન્સી સેવા મળતી હતી. હવે ફાયર સર્વિસને પણ આ નંબર સાથે જોડી દેવાઈ છે. અમદાવાદ શહેરમાં કે કોઈપણ જગ્યાએ આગ લાગે ત્યારે 101 ના બદલે હવે 112 પર કોલ કરવાથી ફાયરની ઈમરજન્સી સેવા મળશે.

રાજ્યની છ મહાનગર પાલિકા - અમદાવાદ, સુરત, વડોદરા, ગાંધીનગર, જામનગર તથા ભાવનગરને આ સર્વિસમાં જોડી દેવાઈ છે. 23 સપ્ટેમ્બરથી આ સર્વિસ યુદ્ધના ધોરણે શરૂ કરી દેવાશે. હવે કોઈપણ ઈમરજન્સી માટે નાગરિકોએ માત્ર એક જ કોમન નંબર 112 પર કોલ કરવાનો રહેશે, જેના પરથી પોલીસ, એમ્બ્યુલન્સ અને ફાયર ત્રણેય સેવા મળશે.

101 નંબર પર કોઈ કોલ કરશે તો પણ તે કોલને પ્રાયોરિટી આપી 112ના કંટ્રોલરૂમમાં ટ્રાન્સફર કરાશે અને ત્યાંથી ફરિયાદના આધારે સર્વિસ અપાશે. આ નવી સિસ્ટમથી રિસ્પોન્સ ટાઈમ, ટ્રાવેલ ટાઈમ, ફાયરના વાહનોનો કેટેગરી આધારિત ઉપયોગ, ઘટના સ્થળની ઈમરજન્સી સહિતનો તમામ ડેટા એક જ નંબર પરથી મળશે. ફાયર વિભાગ પણ રેસ્ક્યૂ સર્વિસનું આગળનું કામ કરી શકશે.

પહેલા તબક્કામાં છ મહાનગરોને આવરી લેવાયા છે, બીજા તબક્કામાં બેઠક બાદ નિર્ણય લેવાશે. કેન્દ્રીય ગૃહ અને સહકાર મંત્રી અમિત શાહે ગાંધીનગર ખાતે 'જનરક્ષક 112' પ્રોજેક્ટનું લોકાર્પણ કર્યું હતું. આ પ્રોજેક્ટ અત્યાધુનિક ટેકનોલોજી અને GPSથી સજ્જ વાહનો દ્વારા સંચાલિત થશે, જે કટોકટીમાં તાત્કાલિક પ્રતિસાદ આપશે.