ગુજરાતમાં છેલ્લા 48 કલાકથી વાતાવરણમાં આવેલા મોટા પલટાને કારણે ગરમીમાં રાહત મળી છે. પ્રી-મોન્સૂન એક્ટિવિટીના કારણે રાજ્યમાં ઠેર-ઠેર વરસાદી માહોલ જામ્યો છે, જેને પગલે હવામાન વિભાગે આજે 3 જૂનના રોજ રાજ્યના 11 જિલ્લાઓમાં ઓરેન્જ એલર્ટ જાહેર કર્યું છે.

હવામાન વિભાગની આગાહી મુજબ, ઉત્તર ગુજરાત અને કચ્છના વિસ્તારોમાં વાતાવરણ વધુ સક્રિય રહેશે. ઓરેન્જ એલર્ટ આપવામાં આવ્યું હોય તેવા જિલ્લાઓમાં બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, ખેડા, પંચમહાલ, દાહોદ, મહિસાગર અને કચ્છનો સમાવેશ થાય છે. આ વિસ્તારોમાં 50 થી 60 કિમી પ્રતિ કલાકની ઝડપે પવન ફૂંકાવાની અને વીજળીના કડાકા સાથે વરસાદ પડવાની સંભાવના છે. આ ઉપરાંત દક્ષિણ ગુજરાત અને સૌરાષ્ટ્રમાં 40 થી 50 કિમી પ્રતિ કલાકની ઝડપે પવન ફૂંકાશે અને હળવાથી મધ્યમ વરસાદ પડશે.

અસહ્ય ગરમીથી લોકોને મોટી મુક્તિ મળી છે. હવામાન વિભાગના આંકડા મુજબ, અમદાવાદમાં સોમવારે તાપમાન 40.8°C હતું, જે મંગળવારે ઘટીને 37°C પર પહોંચ્યું હતું, એટલે કે એક જ દિવસમાં 3.8°C નો ઘટાડો નોંધાયો હતો. સૌથી વધુ રાહત ગાંધીનગરમાં જોવા મળી હતી, જ્યાં તાપમાન સામાન્ય કરતા 4.7°C જેટલું નીચે ઉતરીને 36.2°C નોંધાયું હતું.