પશ્ચિમ બંગાળમાં આગામી વિધાનસભા ચૂંટણી પહેલા રાજકીય વાતાવરણ ગરમાયું છે. કોલકાતાના બેહલા પશ્ચિમ મત વિસ્તારમાં ભાજપના ચૂંટણી કાર્યાલય પર કથિત તોડફોડની ઘટના સામે આવી છે. આ મામલે તૃણમૂલ કોંગ્રેસ (TMC) ના ઉમેદવાર રત્ના ચેટર્જી અને તેમના સમર્થકો વિરુદ્ધ પરણાશ્રી પોલીસ સ્ટેશનમાં એફઆઈઆર દાખલ કરવામાં આવી છે. ભાજપનો આરોપ છે કે રત્ના ચેટર્જીની પ્રત્યક્ષ હાજરીમાં જ આ હિંસા આચરવામાં આવી હતી.

ભારતીય જનતા પાર્ટીએ દાવો કર્યો છે કે પરણાશ્રી વિસ્તારમાં સ્થિત તેમના સ્થાનિક ચૂંટણી કાર્યાલય પર ટીએમસીના કાર્યકર્તાઓએ હુમલો કરીને નુકસાન પહોંચાડ્યું હતું. ભાજપના નેતા અમિત માલવિયાએ સોશિયલ મીડિયા પ્લેટફોર્મ 'X' પર આ ઘટનાનો વીડિયો શેર કરતા પોલીસની ભૂમિકા પર પણ સવાલો ઉઠાવ્યા છે. તેમણે જણાવ્યું હતું કે, જ્યારે ટીએમસીના ગુંડાઓ તોડફોડ કરી રહ્યા હતા ત્યારે પોલીસ ત્યાં હાજર હોવા છતાં મૂકપ્રેક્ષક બની રહી હતી અને હિંસા રોકવામાં નિષ્ફળ ગઈ હતી.

માલવિયાએ પોતાના નિવેદનમાં વધુમાં ઉમેર્યું કે, કોલકાતા જે એક સમયે ટીએમસીનો ગઢ ગણાતો હતો, ત્યાં હવે તેમની પકડ ઢીલી પડી રહી છે અને આ હતાશામાં જ તેઓ હિંસાનો સહારો લઈ રહ્યા છે. બીજી તરફ, રત્ના ચેટર્જીને બેહલા પશ્ચિમ બેઠક પરથી મેદાનમાં ઉતારવામાં આવ્યા છે, જ્યાં આ હિંસક ઘટના બાદ સુરક્ષા એજન્સીઓ સતર્ક થઈ ગઈ છે. હાલમાં પોલીસ આ સમગ્ર મામલે વધુ તપાસ કરી રહી છે.