મહારાષ્ટ્રના રાજકારણમાં ફરી એકવાર મોટી ઉથલપાથલ થવાના સ્પષ્ટ એંધાણ મળી રહ્યા છે. મંગળવારે રાત્રે 11 વાગ્યાની આસપાસ મુખ્યમંત્રીના સત્તાવાર નિવાસસ્થાન વર્ષા ખાતે બે કટ્ટર હરીફ જૂથો વચ્ચે આશરે એક કલાક સુધી બંધ બારણે ગુપ્ત બેઠક યોજાઈ હતી. આ બેઠકમાં રાષ્ટ્રવાદી કોંગ્રેસ પાર્ટીના શરદ પવાર જૂથના વરિષ્ઠ નેતા જયંત પાટીલ અને અજિત પવાર જૂથના પ્રફુલ્લ પટેલ તેમજ પ્રદેશ પ્રમુખ સુનીલ તટકરે વિશેષ રૂપથી ઉપસ્થિત રહ્યા હતા.

આ અચાનક યોજાયેલી મુલાકાતમાં કયા મુદ્દાઓ પર ચર્ચા કરવામાં આવી તે અંગે સત્તાવાર રીતે કોઈ માહિતી આપવામાં આવી નથી, પરંતુ તેનાથી રાજ્યમાં અનેક રાજકીય અટકળો વહેતી થઈ છે. સૂત્રોના જણાવ્યા અનુસાર શરદ પવારની આગેવાની હેઠળની રાષ્ટ્રવાદી કોંગ્રેસ પાર્ટી કેન્દ્ર સરકાર દ્વારા આગામી ચોમાસુ સત્રમાં ફરીથી રજૂ થવા જઈ રહેલા મહિલા અનામત અને સીમાંકન અંગેના બંધારણીય સુધારા બિલને પોતાનું સમર્થન આપી શકે છે.

અગાઉ બજેટ સત્ર દરમિયાન પક્ષે આ બિલની વિરુદ્ધમાં મતદાન કર્યું હતું, પરંતુ ભારતીય જનતા પાર્ટીના નેતાઓ સાથે થયેલી મંત્રણા બાદ તેમના વલણમાં મોટો બદલાવ આવ્યો હોવાનું મનાય છે. અગાઉ લોકસભામાં જરૂરી 2 તૃતીયાંશ બહુમતી ન મળવાના કારણે આ બંધારણીય સુધારો પસાર થઈ શક્યો ન હતો, જેને હવે ફરીથી રજૂ કરવાની તૈયારી ચાલી રહી છે.