ડોનાલ્ડ ટ્રમ્પની ઈરાન સાથે કોઈ ડીલ નહીં કરવાની જાહેરાત સાથે જ સમગ્ર વિશ્વમાં હડકંપની સ્થિતિ જોવા મળી રહી છે. ક્રૂડ ઓઇલમાં ભડકો બોલાઈ ગયો છે. જ્યારે સોના અને ચાંદીની કિંમતોમાં પણ પ્રચંડ કડાકાની સ્થિતિ સર્જાઈ છે.

સોનાની વાત કરીએ સોનામાં સવારે બજાર ખુલ્યા બાદ સામાન્ય કડાકો હતો પરંતુ ટ્રમ્પની જાહેરાત બાદ આ કડાકો એકસાથે વધીને 2555 રૂપિયાને વટાવી ગયો અને સોનું એકદમથી 142837 રૂપિયાને લેવલે આવી ગયું.

બીજી બાજુ ચાંદીના હાલ તો બેહાલ થઈ ગયા હોય તેવા લાગી રહ્યા છે. જે ચાંદી ગઇકાલે 230857 રૂપિયા પર બંધ થઇ હતી તે આજે 230015 રૂપિયાએ ખુલી હતી તે પછી એક ઝાટકે ગગડીને 223206 રૂપિયાના લેવલે પહોંચી ગઈ છે. એટલે કે ચાંદીમાં એકઝાટકે 7831 રૂપિયા સુધીનો કડાકો આવી ગયો છે. ટ્રમ્પના એક એલાનથી જ દુનિયાભરમાં હડકંપની સ્થિતિ જોવા મળી રહી છે.

બીજી બાજુ ક્રૂડ ઓઇલની વાત કરીએ તો જે ગત બે દિવસોમાં 70 થી 72 ડૉલરની આસપાસ ચાલી રહ્યુ હતુ તે આજે સવારે વધીને 76 ડૉલરની આસપાસ ટ્રેડ થઇ રહ્યું હતું પરંતુ અચાનક જ ડોનાલ્ડ ટ્રમ્પની ઈરાન યુદ્ધને લઇને કરેલી જાહેરાતને કારણે ક્રૂડ ઓઈલના ભાવ રોકેટ થઈ ગયા અને સીધા 80 ડૉલરની નજીક પહોંચી ગયા હતા. આજે ક્રૂડ ઓઈલના ભાવ 79.24 ડૉલરની સપાટીને સ્પર્શીને આવી ગયા હતા. તે હાલમાં 78.88 ડૉલર પર ટ્રેડ થઇ રહ્યા છે. આજના દિવસમાં જ બ્રેન્ટ ક્રૂડ ઓઈલની કિંમતમાં 5 ટકા જેટલો એકઝાટકે ઉછાળો આવ્યો છે.