દક્ષિણ કોરિયાના ગિમ્હે આંતરરાષ્ટ્રીય એરપોર્ટ પર મંગળવારે રાત્રે એક મોટી દુર્ઘટના સર્જાતા ટળી ગઈ છે. એરપોર્ટ પર એક પેસેન્જર વિમાનમાં આગ લાગી, વિમાન ઉડાન ભરવાની તૈયારી કરી રહ્યું હતું તે પહેલાં જ વિમાનના પાછળના ભાગમાં આગ લાગી ગઈ હતી. કહેવામાં આવી રહ્યું છે કે વિમાનમાં 176 મુસાફર સવાર હતા. માહિતી અનુસાર આ અકસ્માતમાં કોઈ પણ પ્રકારની જાનહાનિ થઈ નથી, બધા મુસાફરો અને ક્રૂને સુરક્ષિત રીતે બહાર કાઢવામાં આવ્યા છે.

આ એર બુસાન વિમાન A321 દક્ષિણ-પૂર્વીય શહેર બુસાનથી હોંગકોંગ જવા માટે ઉડાન ભરવાની તૈયારી કરી રહ્યું હતું તે પહેલાં જ વિમાનમાં આગ લાગી હોવાની જાણ થઈ હતી. ત્યારબાદ 45 ફાયરબ્રિગેડની ગાડી તાત્કાલિક ઘટનાસ્થળે પહોંચી ગઈ. આ ઘટના રાત્રે લગભગ 10:30 વાગ્યે બની હતી અને તેનો વીડિયો પણ સામે આવ્યો છે, જેમાં જોઈ શકાય છે કે વિમાનના પાછળના ભાગમાંથી ધુમાડો નીકળી રહ્યો છે અને ફાયર બ્રિગેડના વાહનો પણ છે અને વિમાનની આસપાસ ઘણા લોકો હાજર છે.

અધિકારીઓના જણાવ્યા અનુસાર બધા મુસાફરો અને ક્રૂ સભ્યોને ઈન્ફલેટેબલ સ્લાઈડનો ઉપયોગ કરીને બહાર કાઢવામાં આવ્યા હતા. આ અકસ્માતમાં ત્રણ લોકો ઘાયલ થયા હોવાનું જણાવવામાં આવી રહ્યું છે, જેમને હોસ્પિટલમાં દાખલ કરવામાં આવ્યા છે. જોકે તેમની હાલત ગંભીર નથી. ફાયર બ્રિગેડે આગ પર સંપૂર્ણ કાબુ મેળવી લીધો છે. હાલમાં આગની ઘટનાની તપાસ ચાલી રહી છે.