ફરીદાબાદના સિકરૌના ગામમાં પોલીસ ચોકીથી થોડા જ મીટરના અંતરે આવેલી ખાનગી શાળામાં દિવસના સમયે એક મહિલા શિક્ષિકાની ચાકુના ઘા મારીને હત્યા કરી દેવામાં આવી હતી. નકાબ પહેરેલા એક યુવકે શાળાની અંદર ઘૂસીને 32 સેકન્ડમાં 34 વખત ચાકુથી વાર કરીને શિક્ષિકાને મોતને ઘાટ ઉતારી દીધી હતી અને સ્થળ પરથી ફરાર થઈ ગયો હતો. આ ઘટના શાળામાં લાગેલા સીસીટીવી કેમેરામાં કેદ થઈ ગઈ છે. પોલીસ આ મામલાની તપાસ કરી રહી છે અને આરોપીની શોધખોળ કરવામાં આવી રહી છે.

મૃતકની ઓળખ સિકરૌના ગામની ખાનગી શાળામાં ભણાવતી સંધ્યા તરીકે થઈ છે. સોમવારે તે દરરોજની જેમ બાળકોને ભણાવવા માટે શાળાએ પહોંચી હતી. થોડીવાર પછી મોઢા પર કપડું બાંધીને એક યુવક શાળાએ પહોંચ્યો હતો અને શિક્ષિકા સંધ્યાને મળવાની વાત કરી હતી. સંધ્યા જેવી શાળાના ગેટ પર મળવા માટે પહોંચી કે તરત જ યુવકે તેની ગરદન પર ચાકુથી હુમલો કરી દીધો હતો. સંધ્યાએ પોતાની જાતને બચાવવાનો પ્રયત્ન કર્યો હતો, પરંતુ યુવક તેના પર સતત વાર કરતો રહ્યો હતો. બૂમાબૂમ સાંભળીને શાળાના સંચાલક સ્થળ પર પહોંચ્યા હતા અને સંધ્યાને બચાવવાનો પ્રયત્ન કર્યો હતો, પરંતુ યુવક તેમની તરફ પણ ચાકુ લઈને દોડી આવ્યો હતો.

યુવકે 32 સેકન્ડમાં 34 વખત ચાકુથી વાર કરીને સંધ્યાને મોતને ઘાટ ઉતારી દીધી હતી અને ત્યારબાદ સ્થળ પરથી ફરાર થઈ ગયો હતો. આ ઘટનાથી શાળામાં નાસભાગ મચી ગઈ હતી. પોલીસે આરોપી યુવક વિરુદ્ધ ગુનો નોંધી લીધો છે અને તેની શોધખોળ શરૂ કરી દીધી છે. શાળાની અંદર બનેલી મહિલા શિક્ષિકાની હત્યાની આ ઘટના સીસીટીવી કેમેરામાં કેદ થઈ ગઈ છે, જેમાં જોઈ શકાય છે કે નકાબ પહેરેલો યુવક શાળામાં પ્રવેશે છે અને થોડીવાર રાહ જુએ છે. શિક્ષિકા આવતાની સાથે જ તે તેના પર હુમલો કરી દે છે અને તેને પકડીને બહાર ખેંચતા ખેંચતા ચાકુથી હુમલો કરવા લાગે છે.

પોલીસનું કહેવું છે કે હત્યાની આખી ઘટના સીસીટીવી કેમેરામાં કેદ થઈ છે અને તે દ્રશ્યોના આધારે આરોપીની ઓળખ કરવાનો પ્રયાસ થઈ રહ્યો છે. પ્રારંભિક તપાસમાં હત્યાના કારણોની ખબર પડી નથી. પોલીસ બધા પાસાંને ધ્યાનમાં રાખીને તપાસ કરી રહી છે અને આરોપીની જલદી ધરપકડ કરવાનો દાવો કરી રહી છે. પોલીસે મૃતદેહને પોસ્ટમોર્ટમ અર્થે ખસેડીને વધુ તપાસ હાથ ધરી છે.