રાજૌરીઃ જમ્મુ-કાશ્મીર પોલીસે રાજૌરીમાં લશ્કર-એ-તૈયબા સાથે જોડાયેલા હોવાનું કહેવાતા ઓવર ગ્રાઉન્ડ વર્કર નેટવર્કનો પર્દાફાશ કરીને 3 આરોપીઓની ધરપકડ કરી છે. પોલીસે ઝાકિર હુસૈન, મોહમ્મદ આઝમ અને મોહમ્મદ મુશ્તાકની ધરપકડ કરી છે. ઝાકિર અને આઝમ કોટચરવાલ તેરિયાથ, રાજૌરીના રહેવાસી છે, જ્યારે મુશ્તાક ઉધાન, રાજૌરીનો રહેવાસી છે.

પીર પંજાલ વિસ્તારમાં સક્રિય આતંકી મોડ્યુલની તપાસ દરમિયાન આ કાર્યવાહી કરવામાં આવી હતી. પ્રાથમિક તપાસમાં આરોપીઓ આતંકવાદીઓને લોજિસ્ટિકલ મદદ, સુરક્ષિત અવરજવર અને જમીની સ્તરે અન્ય સહાય પૂરી પાડતા હોવાની માહિતી સામે આવી છે. ત્રણેય રાજૌરીના જ રહેવાસી હોવાનું પોલીસે જણાવ્યું છે.

તપાસમાં એવો પણ ખુલાસો થયો છે કે આરોપીઓ કથિત રીતે આતંકવાદીઓ માટે માર્ગદર્શક તરીકે કામ કરતા હતા અને આતંકી જૂથોને કાશ્મીર ખીણ તરફ આગળ વધવામાં મદદ કરતા હતા. નાગરિકો પરના હુમલા સહિતના અનેક મોટા હુમલાઓમાં સામેલ આતંકવાદીઓને પણ તેમણે જમીની મદદ પૂરી પાડી હોવાની પોલીસને શંકા છે.

તપાસ દરમિયાન એક આરોપીની બાતમીના આધારે મોટી સંખ્યામાં IED જપ્ત કરવામાં આવ્યા છે. પ્રાથમિક તપાસ મુજબ, એક આતંકી સંગઠનના સભ્યોએ આ વિસ્ફોટક ઉપકરણો આરોપીને સાચવી રાખવા અને લક્ષિત હુમલામાં ઉપયોગ કરવા માટે આપ્યા હોવાની માહિતી મળી છે. પોલીસે સમગ્ર નેટવર્ક અંગે તપાસ આગળ ધપાવી છે.