હૈદરાબાદના રાજીવ ગાંધી ઇન્ટરનેશનલ એરપોર્ટ પર 3 દિવસમાં વિમાનમાં બોમ્બ મૂકવાની 3 ધમકીઓ મળી છે, જેના પગલે એરપોર્ટને હાઈ એલર્ટ પર રાખવામાં આવ્યું છે. ગઈકાલે વહેલી સવારે એરપોર્ટની કસ્ટમર કેર ટીમને એક ઈ-મેલ મળ્યો હતો. આ ઈ-મેલમાં દાવો કરવામાં આવ્યો હતો કે એમ્સ્ટરડેમથી હૈદરાબાદ આવી રહેલી ક્વાલા લમ્પુર એરવેઝની ફ્લાઈટમાં બોમ્બ મૂકવામાં આવ્યો છે અને વિમાનમાં કોઈ પણ સમયે વિસ્ફોટ થઈ શકે છે.

માત્ર 3 દિવસમાં આવી ત્રીજી ધમકી મળવાથી એરપોર્ટના અધિકારીઓ અને સુરક્ષા એજન્સીઓની ચિંતા વધી ગઈ હતી. જોકે, આવી ધમકી હોવા છતાં આ ફ્લાઈટ એરપોર્ટ પર સુરક્ષિત રીતે ઊતરી હતી. લેન્ડિંગ પછી તરત જ અધિકારીઓએ સાવચેતીના ભાગરૂપે વિમાનને આઈસોલેશન બેમાં ખસેડ્યું હતું. ત્યારબાદ સુરક્ષા એજન્સીઓએ એરપોર્ટના અધિકારીઓ સાથે મળીને વિમાન અને આસપાસના વિસ્તારનું સઘન નિરીક્ષણ કર્યું હતું, પરંતુ તપાસ દરમિયાન કંઈ પણ વાંધાજનક મળ્યું નહોતું.

આ ઘટના પહેલાં શનિવારે મલેશિયાથી આવી રહેલી એર એશિયાની ફ્લાઈટમાં પણ બોમ્બ હોવાની ધમકી મળી હતી. જ્યારે શુક્રવારે જર્મનીના ફ્રેન્કફર્ટથી આવી રહેલી લુફ્થાન્સાની ફ્લાઈટ LH-754માં બોમ્બ મૂકવામાં આવ્યો હોવાની અને વિમાન એરપોર્ટ પર પહોંચે તે પહેલાં જ વિસ્ફોટ થઈ જવાની ધમકી આપવામાં આવી હતી. સદ્‌નસીબે આ ત્રણેય ફ્લાઈટનું સુરક્ષિત ઉતરાણ થયું હતું. હાલમાં ધમકીભર્યા ઈ-મેલ મોકલનારને શોધવા અને આ તમામ ઘટનાઓ એકબીજા સાથે જોડાયેલી છે કે કેમ તે નક્કી કરવા માટે પોલીસની તપાસ ચાલી રહી છે.