સમગ્ર મહારાષ્ટ્રમાં દક્ષિણ-પશ્ચિમ ચોમાસું સત્તાવાર રીતે પહોંચી ગયું છે. મુંબઈમાં ચોમાસાના આગમનની સાથે જ મુશળધાર વરસાદ શરૂ થતાં શહેરના અનેક નીચાણવાળા વિસ્તારોમાં પાણી ભરાઈ ગયા છે. રાતભર પડેલા ધોધમાર વરસાદને કારણે રસ્તાઓ લબાલબ થઈ ગયા છે, જેથી વાહનવ્યવહારને ભારે અસર પહોંચી છે.

ગઈકાલે રાત્રે માત્ર 5 થી 6 કલાકના ટૂંકા ગાળામાં જ મુંબઈના અલગ-અલગ વિસ્તારોમાં 71 થી 99 મિલીમીટર સુધીનો વરસાદ નોંધાયો છે. ભારે વરસાદના કારણે અંધેરી વિસ્તાર સૌથી વધુ પ્રભાવિત થયો છે. અહીં અંધેરી સબવે સંપૂર્ણપણે પાણીમાં ગરકાવ થઈ જતાં બૃહન્મુંબઈ મ્યુનિસિપલ કોર્પોરેશન દ્વારા વાહનચાલકો અને નાગરિકોની સુરક્ષાને ધ્યાનમાં રાખીને તેને વાહનોની અવરજવર માટે બંધ કરી દેવામાં આવ્યો છે. આ અગાઉ 23 જૂને સવારે 8 થી સાંજના 7 વાગ્યા સુધીમાં સૌથી વધુ 78.96 મિલીમીટર વરસાદ સેન્ટ્રલ મુંબઈની નાયર હોસ્પિટલ વિસ્તારમાં નોંધાયો હતો.

હાલમાં પણ મુંબઈના આકાશમાં કાળાડિબાંગ વાદળો છવાયેલા છે. ભારતીય હવામાન વિભાગ દ્વારા મુંબઈમાં હજુ પણ ભારે વરસાદની ચેતવણી જારી કરવામાં આવી છે. આગાહી મુજબ 24 જૂને દિવસભર મધ્યમથી ભારે વરસાદનો સિલસિલો ચાલુ રહી શકે છે, જેનાથી આગામી સમયમાં ટ્રાફિક જામની સમસ્યા વધુ વકરી શકે છે.