અમેરિકી રાષ્ટ્રપતિ ડોનાલ્ડ ટ્રમ્પે અમેરિકન શાળાઓ અને કોલેજોમાં કોઈપણ પ્રકારના વિરોધ પ્રદર્શન પર પ્રતિબંધ મૂકી દીધો છે. ટ્રમ્પે સ્પષ્ટપણે કહ્યું છે કે કોઈપણ શાળા કે કોલેજમાં જ્યાં આવી ઘટનાઓ બને છે તેને ફેડરલ ભંડોળ આપવામાં આવશે નહીં. આમાં સામેલ વિદ્યાર્થીઓ સામે શિક્ષાત્મક કાર્યવાહી પણ કરવામાં આવશે. જો અન્ય દેશોના વિદ્યાર્થીઓ આમાં સંડોવાયેલા જોવા મળશે તો તેમને તેમના સંબંધિત દેશોમાં ડિપોર્ટ કરી દેવામાં આવશે.

યુએસ રાષ્ટ્રપતિ ડોનાલ્ડ ટ્રમ્પે સોશિયલ મીડિયા પ્લેટફોર્મ ટ્રુથ પર એક પોસ્ટમાં કહ્યું કે જે પણ વિદ્યાર્થી આવા આંદોલનો અને પ્રદર્શનોમાં ભાગ લેશે, તેને શાળા કે કોલેજમાંથી હાંકી કાઢવામાં આવશે અને તેની ધરપકડ પણ કરી લેવામાં આવશે. આવા વિદ્યાર્થીઓને અમેરિકાથી તેઓ જે દેશમાંથી આવ્યા હતા ત્યાં પરત મોકલી દેવામાં આવશે.

ટ્રમ્પે સ્પષ્ટપણે કહ્યું હતું કે જે પણ શાળા કે કોલેજ પ્રદર્શન કે વિરોધ પ્રદર્શનની મંજૂરી આપશે તો શાળા-કોલેજને મળતા ભંડોળમાં કાપ મૂકવામાં આવશે. આ ઉપરાંત, ફેડરલ ફંડિંગ પણ બંધ કરી દેવામાં આવશે. આ સાથે ટ્રમ્પે એમ પણ કહ્યું કે તેઓ અને તેમનો પક્ષ અમેરિકામાં અભિવ્યક્તિની સ્વતંત્રતાનો આદર કરે છે. 

અમેરિકાના રાષ્ટ્રપતિ ડોનાલ્ડ ટ્રમ્પે અગાઉ અમેરિકન શાળાઓ, કોલેજો અને યુનિવર્સિટીઓને ધમકી આપી છે. તેમાં કહેવામાં આવ્યું છે કે જો તેઓ ટ્રાન્સજેન્ડર ખેલાડીઓને છોકરીઓની રમત સ્પર્ધાઓમાં રમવાની મંજૂરી આપે છે અથવા ફરજિયાત કોવિડ-19 રસીનો આગ્રહ રાખે છે તો તેમના સરકારી ભંડોળમાં પણ કાપ મૂકવામાં આવશે.