તમિલનાડુની તમિલાગા વેત્રી કઝગમ (TVK)એ NEETમાં કથિત ગેરરીતિઓનો વિરોધ કરતાં માત્ર સુધારાની નહીં પરંતુ સમગ્ર પરીક્ષા પ્રણાલી જ રદ કરવાની માંગ કરી છે. પાર્ટીએ કહ્યું છે કે તબીબી શિક્ષણ સંબંધિત તમામ નિર્ણયોનો અધિકાર રાજ્યોને મળવો જોઈએ અને આ ક્ષેત્રમાં સંપૂર્ણ નિયંત્રણ પણ રાજ્યોને સોંપવામાં આવે.

દિલ્હીમાં NEET મુદ્દે વિદ્યાર્થીઓના વિરોધ વચ્ચે TVKએ જણાવ્યું કે આ મુદ્દે પાર્ટીનું વલણ "અવિરત અને મક્કમ" છે. પાર્ટીના જણાવ્યા અનુસાર, તબીબી અભ્યાસ માટેની રાષ્ટ્રીય સ્તરની પ્રવેશ પરીક્ષા નાબૂદ કરવી જોઈએ. સાથે જ શિક્ષણને બંધારણની સમવર્તી સૂચિમાંથી હટાવી રાજ્ય સૂચિમાં સામેલ કરવાની પણ માંગ કરવામાં આવી છે, જેથી શિક્ષણ સંબંધિત નીતિ નક્કી કરવાની સત્તા રાજ્યોને મળે.

પાર્ટીએ નિવેદનમાં મુખ્ય વિપક્ષ દ્રવિડ મુનેત્ર કઝગમ (DMK)નું નામ લીધા વગર આકરા પ્રહારો કર્યા હતા. TVKએ આરોપ લગાવ્યો કે મત મેળવવા માટે "NEET જાતે જ રદ કરી દેશું" જેવા ખોટા વચનો આપીને લોકોને ગેરમાર્ગે દોરવાની રાજનીતિમાં તે ક્યારેય સામેલ નહીં થાય. ઉલ્લેખનીય છે કે DMKએ વર્ષ 2021ની તમિલનાડુ વિધાનસભા ચૂંટણી પહેલાં સત્તામાં આવ્યા બાદ NEET રદ કરવાનું વચન આપ્યું હતું.