મુંબઈમાં ફિલ્મ અભિનેતા ટાઈગર શ્રોફ પર થયેલા હુમલાને મુદ્દે રાજ્યની કાયદો અને વ્યવસ્થાની આકરી ઝાટકણી કાઢતાં શિવસેના યુબીટીના પક્ષપ્રમુખ ઉદ્ધવ ઠાકરેએ આજે શિવાજી પાર્કમાં આયોજિત દશેરા રેલીમાં રાજ્યના મુખ્ય પ્રધાન અને ગૃહ ખાતાનો હવાલો સંભાળી રહેલા દેવેન્દ્ર ફડણવીસને પડકાર ફેંક્યો હતો કે હિંમત હોય તો આ હુમલાના મુખ્ય સૂત્રધાર લોરેન્સ બિશ્નોઈને સાબરમતી જેલમાંથી મુંબઈ લાવીને દેખાડે. પોતાના ભાષણમાં તેમણે એકનાથ શિંદે, ભાજપ, વડાપ્રધાન નરેન્દ્ર મોદી અને કેન્દ્રીય ગૃહ પ્રધાન અમિત શાહ પર પણ આકરા પ્રહારો કર્યા હતા અને મહારાષ્ટ્રમાં દુષ્કાળની સ્થિતિ અંગે પણ વાત કરી હતી.

ઉદ્ધવ ઠાકરેએ અભિનેતા ટાઈગર શ્રોફ પર થયેલા હુમલાનો ઉલ્લેખ કરીને એકનાથ શિંદેની ટીકા કરી હતી. તેમણે કહ્યું હતું કે હુમલાની ઘટના બાદ શિંદે તરત જ ટાઈગર શ્રોફને મળવા પહોંચી ગયા હતા. ઠાકરેએ સવાલ કર્યો હતો કે હુમલા બાદ પોલીસે આરોપીઓને પકડી લીધા તેના માટે પ્રશંસા કરવી જોઈએ કે પછી આવી ઘટના બની જ કેમ તે અંગે સરકારને જવાબદાર ઠેરવવી જોઈએ. તેમણે કહ્યું હતું કે ટાઈગર શ્રોફ સદનસીબે બચી ગયા, પરંતુ જો ગોળી થોડી ઉપર વાગી હોત તો આરોપીઓની ધરપકડનો કોઈ જ અર્થ રહ્યો ન હોત.

ઠાકરેએ રાજ્ય સરકારની કામગીરી પર સવાલ ઉઠાવતાં કહ્યું હતું કે સરકારમાં પોલીસને અન્ય કામોમાં વ્યસ્ત રાખવામાં આવી રહી છે. તેમણે આરોપ લગાવ્યો કે સામાન્ય નાગરિકો કે વિરોધ પક્ષના લોકોની નાની બાબતોમાં પોલીસ તેમને તરત જ પોલીસ સ્ટેશન બોલાવે છે, પરંતુ ટાઈગર શ્રોફ પર હુમલો કરનારા આરોપીઓ પોલીસની નજરમાંથી કેવી રીતે છટકી ગયા, નાકાબંધી દરમિયાન પોલીસને તેમની જાણ કેમ ન થઈ અને હુમલાખોરો મુંબઈ સુધી કેવી રીતે પહોંચ્યા.