ઉત્તરાખંડ આજે ઈતિહાસ રચવા જઈ રહ્યું છે. યુનિફોર્મ સિવિલ કોડ (UCC) લાગુ કરનાર ઉત્તરાખંડ પ્રથમ રાજ્ય બનવા જઈ રહ્યું છે. આ ઐતિહાસિક કાયદો વડાપ્રધાન નરેન્દ્ર મોદીના ઉત્તરાખંડ પ્રવાસ પહેલા લગભગ 12:30 વાગ્યે લાગુ કરવામાં આવશે. અધિકારીઓના જણાવ્યા અનુસાર, સમગ્ર ઉત્તરાખંડમાં UCC લાગુ કરવામાં આવશે. આ કાયદો રાજ્યની બહાર રહેતા ઉત્તરાખંડના લોકો પર પણ લાગુ થશે.

UCC પોર્ટલનું આજે રાજ્ય સચિવાલય ખાતે અનાવરણ કરવામાં આવશે. ઉત્તરાખંડના મુખ્યમંત્રી પુષ્કર સિંહ ધામી આ કાર્યક્રમનું નેતૃત્વ કરશે. એક દિવસ અગાઉ (26 જાન્યુઆરી), સીએમ ધામીએ કહ્યું હતું કે યુસીસી ધર્મ, લિંગ, જાતિ અથવા સમુદાયના આધારે ભેદભાવથી મુક્ત સુમેળભર્યા સમાજનો પાયો સ્થાપિત કરશે.

ભારતીય બંધારણમાં ગોવાને વિશેષ રાજ્યનો દરજ્જો મળ્યો છે. તેમજ કાયદો બનાવીને સંસદે ગોવાને પોર્ટુગીઝ સિવિલ કોડ લાગુ કરવાનો અધિકાર આપ્યો હતો. તેથી, ગોવા એકમાત્ર રાજ્ય છે જ્યાં UCC લાગુ છે. હવે ઉત્તરાખંડ પહેલું રાજ્ય બનશે જ્યાં સ્વતંત્રતા પછી સમાન નાગરિક સંહિતા લાગુ કરવામાં આવશે.