જમ્મુ-કાશ્મીરમાં સતત વરસી રહેલા ભારે વરસાદની અસર વૈષ્ણોદેવી યાત્રા પર પડી હતી. શ્રદ્ધાળુઓની સુરક્ષાને ધ્યાનમાં રાખીને વૈષ્ણોદેવી યાત્રા સળંગ ત્રીજા દિવસે પણ સ્થગિત રાખવામાં આવી હતી. યાત્રા બંધ રહેતાં કટરામાં મોટી સંખ્યામાં શ્રદ્ધાળુઓ ફસાઈ ગયા હતા, જ્યારે અનેક લોકોને દર્શન કર્યા વગર જ પરત ફરવાની ફરજ પડી હતી.

વૈષ્ણોદેવી શ્રાઈન બોર્ડના અધિકારીઓએ જણાવ્યું કે હાલ શ્રદ્ધાળુઓની સુરક્ષા સર્વોચ્ચ પ્રાથમિકતા હતી. ભારે વરસાદને કારણે પહાડી વિસ્તારમાં ભૂસ્ખલન અને પથ્થરો પડવાનો ભય હોવાથી સમગ્ર યાત્રામાર્ગ પર સતત નજર રાખવામાં આવી રહી છે. માર્ગ સંપૂર્ણ સુરક્ષિત જાહેર થયા બાદ જ યાત્રા ફરી શરૂ કરવાની મંજૂરી આપવામાં આવશે.

યાત્રા શરૂ ન થતાં મોટી સંખ્યામાં શ્રદ્ધાળુઓ કટરામાં જ રોકાયેલા છે. રિટર્ન ટિકિટ ધરાવતા અનેક ભાવિકો બાણગંગા સુધી પહોંચીને ત્યાંથી જ પરત ફરી રહ્યા છે. કટરા રેલવે સ્ટેશન, બસ સ્ટેશન અને ધર્મશાળાઓની આસપાસ શ્રદ્ધાળુઓની ભારે ભીડ જોવા મળી રહી છે, જ્યારે ઘણા યાત્રિકો યાત્રા ફરી શરૂ થવાની રાહ જોઈ રહ્યા છે.

હવામાન વિભાગ સતત સ્થિતિની સમીક્ષા કરી રહ્યું છે અને વરસાદ અટક્યા બાદ જ આગળનો નિર્ણય લેવાશે. શ્રાઈન બોર્ડે શ્રદ્ધાળુઓને અફવાઓથી દૂર રહેવા અને યાત્રા સંબંધિત માહિતી માત્ર સત્તાવાર માધ્યમોથી જ મેળવવાની અપીલ કરી છે. સ્થાનિક લોકો અને વિવિધ એજન્સીઓ પણ કટરામાં રોકાયેલા યાત્રિકોને જરૂરી સહાય પૂરી પાડી રહ્યા છે.