સુરત જિલ્લાના બારડોલી ખાતે આવેલી અને એશિયામાં સૌથી વધુ શેરડી પીલાણ ક્ષમતા ધરાવતી બારડોલી સુગર ફેક્ટરીની વ્યવસ્થાપક સમિતિની 15 બેઠકો માટે યોજાયેલી સામાન્ય ચૂંટણીમાં મોટો રાજકીય ભૂકંપ સર્જાયો છે. છેલ્લા 10 વર્ષથી સત્તા પર રહેલી ભાજપ પ્રેરિત સહકાર પેનલનો આ ચૂંટણીમાં કારમો પરાજય થયો છે, જ્યારે કિસાન પરિવર્તન પેનલે ઝળહળતો વિજય મેળવ્યો છે.

સહકાર પેનલની 1 બેઠક બિનહરીફ જાહેર થયા બાદ બાકીની બેઠકો માટે મતદાન યોજાયું હતું, જેમાં તેમના ઉમેદવારોનો 263 થી 564 મતોના મોટા અંતરથી પરાજય થયો હતો. શ્રી ખેડૂત સહકારી ખાંડ ઉદ્યોગ મંડળી લિ. તરીકે ઓળખાતી બારડોલી સુગરની આ ચૂંટણી સહકારી ક્ષેત્રમાં સત્તા પરિવર્તનની ચૂંટણી બની ગઈ છે.

10 વર્ષથી સત્તા સંભાળતી સહકાર પેનલનું નેતૃત્વ સુરત જિલ્લા પંચાયતના માજી પ્રમુખ અને સુરત જિલ્લા ભાજપના ઉપપ્રમુખ ભાવેશ પટેલ, સુરત જિલ્લા ખેડૂત સમાજના પ્રમુખ પરિમલ પટેલ અને માજી કેબિનેટ મંત્રી તથા બારડોલીના ભાજપના ધારાસભ્ય ઈશ્વર પરમાર સહિતના તમામ ડિરેક્ટરોએ સંભાળ્યું હતું. તમામ દિગ્ગજ નેતાઓ ચૂંટણી મેદાનમાં ઉતર્યા હતા, છતાં મુકેશ પટેલના નેતૃત્વ હેઠળની કિસાન પરિવર્તન પેનલે ભાજપ સમર્થિત તમામ નેતાઓને હરાવીને મિલમાં શાસન બદલી નાખ્યું છે.

આ ચૂંટણીનો સૌથી રસપ્રદ કિસ્સો બારડોલી બેઠક પર જોવા મળ્યો હતો. બારડોલી સુગર ફેક્ટરીમાં જ નોકરી કરીને છેલ્લા 20 વર્ષથી વિદેશમાં સ્થાયી થયેલા ખેડૂત સભાસદ વિનોદચંદ્ર પટેલ અમેરિકાથી આવીને પરિવર્તન પેનલમાંથી ઉમેદવારી નોંધાવી હતી. તેમણે સહકાર પેનલના ગિરીશ પટેલ સામે 403 મતોની મોટી સરસાઈથી વિજય મેળવ્યો હતો. દર વખતની જેમ આ ચૂંટણીમાં પણ વિદેશમાં સ્થાયી થયેલા ખેડૂત સભાસદોએ નિર્ણાયક ભૂમિકા ભજવી હતી.