હવામાન વિભાગની આગાહી વચ્ચે દક્ષિણ ગુજરાતમાં વરસાદ નોંધાયો છે.  સ્ટેટ ઇમરજન્સી ઓપરેશન સેન્ટર (SEOC), ગાંધીનગરના  અહેવાલ અનુસાર, આજે (22મી જૂન) સવારે 6થી 10 વાગ્યા સુધીના માત્ર 4 કલાકમાં દક્ષિણ ગુજરાતના 21 તાલુકાઓમાં નોંધપાત્ર વરસાદ નોંધાયો છે. આ વરસાદને પગલે ઠેર-ઠેર નીચાણવાળા વિસ્તારોમાં પાણી ભરાઈ જવાની ઘટનાઓ સામે આવી છે.

આજના વરસાદી આંકડા પર નજર કરીએ તો વલસાડ અને સુરત જિલ્લામાં મેઘરાજા સૌથી વધુ મહેરબાન થયા છે. વલસાડ તાલુકામાં 4 કલાકમાં સૌથી 1.18 ઇંચ વરસાદ ખાબક્યો હતો. જ્યારે સુરતના આરેથ તાલુકામાં 1.02 ઇંચ વરસાદ નોંધાયો છે. આ ઉપરાંત તાપી અને નવસારી જિલ્લાના અન્ય વિસ્તારોમાં પણ સવારથી જ વરસાદી માહોલ છવાયેલો રહ્યો છે. 

સવારના ઓફિસ અને શાળાના સમયે જ શરૂ થયેલા વરસાદને કારણે સુરત સિટી અને વલસાડના મુખ્ય માર્ગો તેમજ નીચાણવાળા સોસાયટી વિસ્તારોમાં પાણી ભરાઈ ગયા હતા. પાણી ભરાઈ જવાના કારણે વાહનચાલકોને ભારે હાલાકીનો સામનો કરવો પડ્યો હતો અને અનેક સ્થળે ટ્રાફિક જામના દ્રશ્યો સર્જાયા હતા. ખેડૂતો માટે આ વરસાદ વાવણી લાયક સાબિત થતાં કૃષિ આલમમાં ખુશીનો માહોલ જોવા મળી રહ્યો છે.