આણંદ-બોરસદ રોડ પર એક રિસોર્ટ નજીક બે બાઇક સામસામે અથડાતાં ગંભીર અકસ્માત સર્જાયો હતો. પૂરઝડપે થયેલી ટક્કરમાં 3 યુવાનોના સ્થળ પર જ મોત નીપજ્યાં હતા, જ્યારે અન્ય 3 યુવાનો ગંભીર રીતે ઇજાગ્રસ્ત થયા હતા. અકસ્માતનો ભોગ બનેલા તમામ 6 યુવાનો બોરસદ તાલુકાના નાપાવાંટા ગામના રહેવાસી હોવાનું સામે આવ્યું છે.

મળતી માહિતી મુજબ, બોરસદ તરફ જવાના માર્ગ પર રિસોર્ટ નજીક બંને બાઇક સામસામે પૂરઝડપે અથડાઇ હતી. ટક્કર એટલી જોરદાર હતી કે બંને બાઇકને ભારે નુકસાન થયું હતું. અકસ્માતમાં ગંભીર ઇજાઓના કારણે અરમાન રાણા, સમીર રાણા અને અંસાર ઝુબેર બેલિમના મોત નીપજ્યાં હતાં.

અકસ્મતાની જાણ થતાં સ્થાનિક લોકો ઘટનાસ્થળે એકત્ર થયા હતા અને પોલીસ તથા 108 એમ્બ્યુલન્સને જાણ કરી હતી. ગંભીર રીતે ઇજાગ્રસ્ત થયેલા અન્ય 3 યુવાનોને તાત્કાલિક નજીકની હોસ્પિટલમાં સારવાર માટે ખસેડવામાં આવ્યા હતા. પોલીસે મૃતદેહોને પોસ્ટમોર્ટમ માટે ખસેડીને અકસ્માત અંગે ગુનો નોંધી વધુ તપાસ હાથ ધરી છે.

એક જ ગામના 3 યુવાનોના અકાળે મોતથી નાપાવાંટા ગામમાં શોકની લાગણી ફેલાઇ હતી. અકસ્માતની ઘટનાને પગલે ગામમાં માતમ છવાઇ ગયો હતો અને પરિવારજનોમાં પણ ભારે દુઃખની લાગણી જોવા મળી હતી.