મંગળવારે સવારે જલગાંવના માંગરુલ ગામ નજીક અમલનેર-ધુલે હાઈવે પર 3 વાહનો વચ્ચે થયેલા ભયાનક અકસ્માતમાં 5 લોકોના મોત થયા હતા અને 2 લોકો ઘાયલ થયા હતા. આ ગમખ્વાર અકસ્માત સેડાન કાર, રાજ્ય પરિવહન બસ અને મોટરસાઈકલ વચ્ચે સર્જાયો હતો.

નાયબ પોલીસ અધિક્ષક વિનાયક કોટેના જણાવ્યા અનુસાર, આ અકસ્માત સવારે લગભગ 7 વાગ્યે થયો હતો. એક સેડાન કાર અને એક મોટરસાઈકલ ધુલેથી અમલનેર તરફ જઈ રહ્યા હતા, ત્યારે સેડાને પાછળથી મોટરસાઈકલને ટક્કર મારી હતી. આ ટક્કર બાદ કાર સામેથી આવતી રાજ્ય પરિવહન બસ સાથે અથડાઈ હતી. અમલનેર-ધુલે રોડ ડિવાઈડર વિનાનો એક જ રસ્તો હોવાથી આ ગંભીર અકસ્માત સર્જાયો હતો.

આ અકસ્માતમાં મોટરસાઈકલ પર સવાર એક મહિલા સહિત 2 લોકોના મોત થયા હતા. સેડાનમાં 4 મુસાફરો સવાર હતા, જેમાં એક મહિલા સહિત 3 મુસાફરોનું ઘટનાસ્થળે જ મોત નીપજ્યું હતું, જ્યારે ડ્રાઈવરને ઈજાઓ પહોંચી હતી. આ ઉપરાંત બસમાં સવાર એક મુસાફરને પણ સામાન્ય ઈજાઓ થઈ હતી. 3 વાહનોની ટક્કરનો અવાજ સાંભળીને સ્થાનિક લોકો મદદ માટે ઘટનાસ્થળે દોડી ગયા હતા અને ઈજાગ્રસ્તોને સારવાર અર્થે નજીકની હોસ્પિટલમાં ખસેડ્યા હતા.

અકસ્માતને પગલે થોડા સમય માટે હાઈવે પર ટ્રાફિક ખોરવાઈ ગયો હતો. જોકે, પોલીસે ઘટનાસ્થળે પહોંચીને ક્ષતિગ્રસ્ત વાહનોને રસ્તા પરથી હટાવ્યા બાદ ટ્રાફિક વ્યવહાર ફરી રાબેતા મુજબ શરૂ થયો હતો.