રાજકોટ  : હાલના સમયમાં નાની ઉંમરે હાર્ટ એટેક આવવાના કિસ્સાઓ ચિંતાજનક રીતે વધી રહ્યા છે, ત્યારે  જામનગરના ચાંદી બજાર વિસ્તારમાં રહેતી માત્ર 14 વર્ષીય સગીરાનું રાજકોટ ખાતે મામાના ઘરે રમતાં-રમતાં અચાનક હાર્ટ એટેક આવવાના કારણે મોત નીપજ્યું છે. આ અકાળ અવસાનથી પરિવાર સહિત સમગ્ર પંથકમાં ભારે અરેરાટી સાથે શોકનું મોજું ફરી વળ્યું છે.

મળતી માહિતી અનુસાર, જામનગર શહેરના ચાંદી બજાર મોટી ફળી નજીક રહેતા રાજેશ મોદીની 14 વર્ષીય પુત્રી આનંદી મોદી રાજકોટ ખાતે મામાના ઘરે પુરુષોત્તમ માસના ધાર્મિક પ્રસંગે ગઈ હતી. રવિવાર (સાતમી જૂન)ની સાંજે પરિવારના સભ્યો સાથે તે બહાર રેસ્ટોરન્ટમાં જમવા માટે ગઈ હતી. જમ્યા બાદ હોટેલ પરિસરમાં જ તે અન્ય બાળકો સાથે રમી રહી હતી, તે દરમિયાન દોડતાં-દોડતાં અચાનક જ જમીન પર ઢળી પડી હતી. 

આનંદી અચાનક બેભાન થઈને ઢળી પડતાં પરિવારજનોના જીવ અધ્ધર થઈ ગયા હતા. તેને તાત્કાલિક લોહીલુહાણ સ્થિતિમાં સારવાર અર્થે નજીકની હોસ્પિટલમાં ખસેડવામાં આવી હતી.

જોકે, હોસ્પિટલ ખાતે તબીબોના તમામ સઘન પ્રયાસો છતાં આનંદીને બચાવી શકાઈ નહોતી અને સારવાર દરમિયાન જ તેનું મોત નીપજ્યું હતું. પ્રાથમિક તબીબી તપાસમાં બાળકીનું મોત હાર્ટ એટેકના કારણે થયું હોવાનું સામે આવ્યું છે.