દુબઈ મરીનામાં 67 માળની રહેણાંક બિલ્ડિંગ મરીના પિનેકલમાં ભીષણ આગ લાગી હતી. આ બિલ્ડિંગને ટાઈગર ટાવર તરીકે પણ ઓળખવામાં આવે છે. મીડિયા રિપોર્ટ મુજબ શુક્રવારે રાત્રે લગભગ 9:30 વાગ્યે ઉપરના માળે આગ લાગી હતી અને તે અનેક સ્તરોમાં ફેલાઈ ગઈ હતી. દુબઈ સિવિલ ડિફેન્સે તાત્કાલિક કાર્યવાહી કરી અને 6 કલાકની મહેનત પછી આગને કાબૂમાં લીધી હતી.

આ સમય દરમિયાન 764 એપાર્ટમેન્ટમાં રહેતા 3,820 લોકોને સુરક્ષિત રીતે બહાર કાઢવામાં આવ્યા હતા. દુબઈ મીડિયા ઓફિસે પુષ્ટિ આપી હતી કે કોઈ જાનહાનિ કે ઈજા થઈ નથી. આગની જાણ થતાં જ દુબઈ સિવિલ ડિફેન્સ, પોલીસ અને એમ્બ્યુલન્સ ટીમો ઘટનાસ્થળે દોડી ગઈ હતી. ડીએમઓએ જણાવ્યું હતું કે ખાસ ટીમો તમામ રહેવાસીઓની સલામતી સુનિશ્ચિત કરવામાં સફળ રહી છે. 

કેટલાક રહેવાસીઓની એલાર્મ સિસ્ટમે કામ ન કરી અને તેમને પડોશીઓના અવાજ અથવા ધુમાડાની ગંધથી ભયનો ખ્યાલ આવ્યો હતો. ઘણા લોકોને ધુમાડાના કારણે સીડીઓને બદલે લિફ્ટથી બહાર કાઢવામાં આવ્યા હતા કારણ કે ધુમાડોમાં સીડીઓને ઉપયોગ અસુરક્ષિત બની રહ્યો હતો. રહેવાસીઓએ કટોકટી સેવાઓના ઝડપી અને સંકલિત પ્રતિભાવની પ્રશંસા કરી હતી.