ગોવાના બાગા બીચ પર પ્રવાસીઓ માટે એડવેન્ચર જીવલેણ સાબિત થતા રહી ગઈ. રવિવારે સાંજે પેરાસેલિંગ કરી રહેલા એક પ્રવાસીનો હવામાં જ કેબલ તૂટી જતાં તે અનેક ફૂટની ઊંચાઈએથી સીધો ઊંડા દરિયામાં ખાબક્યો હતો. આ સમગ્ર ઘટના કિનારે ઉભેલા એક વ્યક્તિએ મોબાઈલ કેમેરામાં કેદ કરી લીધી હતી, જેનો વીડિયો હાલ સોશિયલ મીડિયા પર વાઈરલ થઈ રહ્યો છે.

અહેવાલો અનુસાર, 30મી માર્ચની સાંજે જ્યારે બીચ પર પ્રવાસીઓની ભારે ભીડ હતી, ત્યારે એક યુવક પેરાસેલિંગની મજા માણી રહ્યો હતો. બોટ દ્વારા પેરાશૂટને હવામાં ખેંચવામાં આવી રહ્યું હતું, ત્યારે અચાનક પેરાશૂટ અને બોટને જોડતો મજબૂત કેબલ વચ્ચેથી તૂટી ગયો હતો. કેબલ તૂટતાની સાથે જ પેરાશૂટ પરથી કાબૂ ગુમાવ્યો અને પળવારમાં જ પ્રવાસી દરિયાના મોજાંઓ વચ્ચે પટકાયો હતો.